Maładziožnaja pałata pry Minharsaviecie praviała svajo «apytańnie»: u Łukašenki 61%, u Babaryki — 4%
Maładziožnaja pałata pry Minskim haradskim Saviecie deputataŭ — moładzievy parłamient, čyje rašeńni majuć rekamiendacyjny charaktar. Na staroncy hetaha orhana źjavilisia vyniki «apytańnia» na temu majučych adbycca prezidenckich vybaraŭ.
Paviedamlajecca, što pałata nibyta «praviała zrez siarod aktyŭnaj moładzi horada Minska» i zapytałasia: «Za kaho siarod mahčymych kandydataŭ u prezidenty vy b prahałasavali?»
Kolki čałaviek uziali ŭdzieł u hetym «apytańni», jaki skład udzielnikaŭ, jakaja mietadałohija — nijakaj infarmacyi ab hetym moładzievaja pałata nie raźmiaściła. Takoje «apytańnie» nielha ličyć surjoznym sacyjałahičnym daśledavańniem.
Pałata zapeŭnivaje, što lidaram «apytańnia» staŭ Łukašenka (61%). Druhuju pazicyju namalavali kandydatu «Suprać usich» (20%), treciaje miesca dali Hajdukieviču — 7%.
Valeryj Capkała nibyta atrymaŭ 6%, a Viktar Babaryka ŭsiaho 4%.
Takija vyniki vyhladajuć niepraŭdapadobnymi na fonie apytańniaŭ, praviedzienych na najbujniejšych biełaruskich ŚMI i telehram-kanałach. Vyniki apytańniaŭ najbujniejšych biełaruskich ŚMI dajuć pieršaje miesca Viktaru Babaryku, a Alaksandr Łukašenka značna jamu prajhraje.
Čytajcie taksama: Babaryka, Cichanoŭski, Łukašenka — apytanki ŭ internecie pakazvajuć niečakanyja vyniki
