Dziŭny vypadak u Mahilovie: mužčyna zakidaŭ «hranatami» dom i z nažami napaŭ na haspadara
SK paviedamiŭ pra dziŭny vypadak, jaki zdaryŭsia 19 maja ŭ Mahilovie.
Unačy mužčyna z dapamohaj leśvicy prakraŭsia na terytoryju pryvatnaha doma, dzie žyvuć pažyłyja muž i žonka. Jon abliŭ uvachodnyja dźviery doma lohkaŭzharalnaj vadkaściu, jakuju prynios z saboj u kanistry, i padpaliŭ. Paśla čaho raźbiŭ akno ŭ domie i zakinuŭ u pamiaškańnie samarobny vybuchaniebiaśpiečny pradmiet.
A kali sprabavaŭ kinuć anałahičnuju pryładu ŭ druhoje akno, pradmiet vybuchnuŭ ŭ jaho ŭ rukach.
Adnak heta nie spyniła mužčynu. Kali 67-hadovy haspadar doma vyjšaŭ na dvor i pačaŭ tušyć połymia, mužčyna ŭdaryŭ jaho nažom. Paśla taho jak paciarpieły vybiŭ ź jaho ruk nož, mužčyna dastaŭ druhi nož i nanios haspadaru doma jašče adzin udar. Niahledziačy na atrymanyja ranieńni, piensijanier akazaŭ supraciŭ i ŭtrymlivaŭ jaho da pryjezdu supracoŭnikaŭ milicyi.
Ź ciažkimi cialesnymi paškodžańniami paciarpieły dastaŭleny ŭ balnicu, jaho žyćciu ničoha nie pahražaje. Padazravany taksama špitalizavany z traŭmami hałavy i abiedźviuch kiściaŭ ruk.
Padazravany žyŭ niedaloka ad doma paciarpiełych, nijakich kanfliktnych situacyj pamiž imi nie ŭźnikała. U dačynieńni da padazravanaha pryznačyli kompleksnuju sudovuju psichołaha-psichijatryčnuju ekśpiertyzu.
