Premjery krain Bałtyi: Pieršaja chvala karanavirusa ŭziataja pad kantrol
Delfi
Premjer-ministry bałtyjskich dziaržaŭ śćviardžajuć, što krainy paśpiachova ŭziali pad kantrol pieršuju chvalu karanavirusa, što dazvoliła ź piatnicy admianić abmiežavańni na pieramiaščeńni hramadzian Litvy, Łatvii i Estonii ŭnutry troch dziaržaŭ, piša Delfi.lt.
«My možam paradavacca tamu, što my, try bałtyjskija dziaržavy, paśpiachova ŭziali pad kantrol pieršuju chvalu virusa COVID-19 i pieršymi ŭ Jeŭrasajuzie adkryvajem miežy dla našych hramadzian. Adnak my i dalej budziem zastavacca pilnymi i adkazna achoŭvać prastoru Łatvii, Litvy i Estonii. Davajcie budziem u biaśpiecy razam», — zajaviŭ premjer Litvy Saŭlus Skviarnialis u videazvarocie, raspaŭsiudžanym u piatnicu.
Jak adznačyŭ łatvijski premjer Kryšjanis Karyńš, «heta vielmi važny dzień, pakolki my, try bałtyjskija dziaržavy, viartajemsia ŭ ahulnuju prastoru, znoŭ dazvalajučy svabodnaje pieramiaščeńnie ludziej pamiž tryma bałtyjskimi dziaržavami».
«Heta adbyłosia dziakujučy vydatnamu supracoŭnictvu našych ludziej i ŭradaŭ», — skazaŭ jon.
Pa słovach kiraŭnika estonskaha ŭrada Jury Ratasa, utajmavaŭšy raspaŭsiudžvańnie karanavirusa, «my možam zrabić nastupny krok u napramku našaha zvyčajnaha žyćcia». «My možam skarystacca hetym vypadkam, davajcie budziem zdarovymi razam!», — skazaŭ Ratas.
Žychary krain Bałtyi, u vypadku, kali jany apošnija 14 dzion nie pakidali Litvu, Łatviju abo Estoniju, zmohuć padarožničać u hetyja dziaržavy, i im nie daviadziecca vykonvać abaviazkovuju 14-dzionnuju izalacyju. Adnak pracedury pravierki dakumientaŭ zachoŭvajucca.
Hramadzianie bałtyjskich krain, jakija viartajucca ź inšych zamiežnych dziaržaŭ, pa-raniejšamu abaviazanyja samaizalavacca na dva tydni, jany zmohuć heta zrabić u svaich rodnych krainach.
Z paniadziełka svabodnym źjaŭlajecca pieramiaščeńnie žycharoŭ Litvy i Polščy, kali jany iduć z metami biźniesu, navučańnia abo pracy.
Za ŭvieś čas pandemii ŭ Estonii zafiksavana 1758 vypadkaŭ (62 śmierci), u Litvie 1511 vypadkaŭ (54 śmierci), u Łatvii 970 vypadkaŭ (19 śmierciaŭ).
