Sajt «Miedyja-Paleśsie» aštrafavali na 3240 rubloŭ, bo «spryjaŭ raspaŭsiudu paničnych nastrojaŭ»
U Łunincy 13 maja miascovaje vydańnie «Miedyja-Paleśsie» aštrafavali na 120 bazavych vieličyniaŭ (heta 3240 rubloŭ) «za raspaŭsiud infarmacyi, jakaja naniesła škodu nacyjanalnym intaresam Biełarusi i spryjała raspaŭsiudu paničnych nastrojaŭ, napisaŭ u svaim fejsbuku staršynia Biełaruskaj asacyjacyi žurnalistaŭ Andrej Bastuniec.
Pavodle Bastunca, heta moža być pieršym vypadkam užyvańnia novaj normy z Kodeksa ad administracyjnych pravaparušeńniach — častki 3-1 art. 22.9 KaAP RB. Pavodle hetaj častki artykuła, za raspaŭsiud zabaronienaj infarmacyi ŭ ŚMI mohuć karać štrafam da 200 bazavych vieličyniaŭ (5400 rubloŭ na momant publikacyi).
«Miedyja-Paleśsiu» ŭ krasaviku vynosili papiaredžańnie za publikacyju niepraŭdzivaj infarmacyi ab śmierci adnaho z chvorych na COVID-19. Vydańnie pisała, što nie zmahło atrymać adkazaŭ z aficyjnych krynicaŭ, tamu źviarnułasia da znajomaha doktara — toj skazaŭ, što pacyjent pamior. Ale jon pamyliŭsia, pra pamyłku nieŭzabavie paviedamili kalehi pacyjenta, na sajcie jaje apieratyŭna vypravili, vybačylisia pierad žonkaj pacyjenta.
