Na parad Pieramohi pryjšli 18 zamiežnych pasłoŭ. Chto byŭ, a chto admoviŭsia?
U pačatku tydnia MZS Biełarusi razasłaŭ u pasolstvy i konsulstvy, jakija pracujuć u našaj krainie, zaprašeńni pryniać udzieł u paradzie 9 maja, piša Tut.by.
Zaprašeńnie pryniali pasły Rasii, Kitaja, Azierbajdžana, Armienii, Vienhryi, Słavakii, Vieniesueły, Vjetnama, Irana, KNDR, Kazachstana, Kyrhyzstana, Małdovy, Paleściny, Turcyi, Tadžykistana, AAE, Sierbii. Darečy, mienavita pasoł Sierbii Vielka Kavačevič — adziny, chto napiaredadni nadzieŭ masku na ŭračystuju cyrymoniju ŭ Minsku z udziełam prezidenta Biełarusi.
Taksama na parad pryjduć časovy pavierany ŭ spravach Sudana, časovy pavierany ŭ spravach Livii, časovy pavierany ŭ spravach Pakistana, Pastpradstaŭnik RF pry SND.
Kiraŭniki dyppradstaŭnictvaŭ ZŠA, Niamieččyny, Polščy, Francyi, Brytanii, Ukrainy, Aŭstryi, Litvy, Šviecyi, Łatvii, Estonii, Japonii, Italii i Čechii na paradzie nie prysutničali.
Vajskoŭcy Rasii i Kitaja, jakija pavinny byli ŭdzielničać u paradzie, admianili svoj udzieł. Nie pryjechaŭ u Minsk i nivodny kiraŭnik zamiežnaj dziaržavy. Nie zaŭvažanyja byli i rasijskija deputaty, na pryjezd jakich raźličvaŭ Alaksandr Łukašenka.
Častka hledačoŭ na trybunach siadzieli ŭ maskach. Varta adznačyć, što ludzi na trybunach byli rassadžanyja ciesna, biez vykanańnia 2-mietrovaj dystancyi, rekamiendavanaj miedykami na pieryjad pandemii. U maskach siadzieli pieravažna ludzi maładziejšyja, tady jak vieterany pieravažna abychodzilisia biez masak.
Sam ža parad adbyŭsia ŭ poŭnym farmacie, z prachodam vajskoŭcaŭ i vajskovaj techniki, a taksama pralotam avijatechniki. Mieŭ miesca taksama vystup roty hanarovaj varty.
Parad 2020 hoda sabraŭ našmat mienš hledačoŭ, čym zvyčajna. Byli zapoŭnienyja trybuny, ale ŭzdoŭž parapietaŭ na navakolnych vulicach stajali tolki niekalki tysiač minčukoŭ.
Pavodle papiarednich acenak MUS, na parad u Minsku pryjšło bolš za 15 000 hledačoŭ.
Dla paraŭnańnia: pa aficyjnych źviestkach u 2017 hodzie parad sabraŭ da 250 tysiač hledačoŭ, u 2015-m — kala 600 tysiač.
Na trybunach, kudy ludziej źbirali pa raznaradcy, sioleta było 11 tysiač miescaŭ.
