Pačać žyćcio na addalency: 7 praviłaŭ ad psichołaha dla samaizalacyi biez strat
Pieračakać epidemiju na dybačkach, zatrymaŭšy dychańnie, nie atrymałasia. Biełarusy nie stali čakać aficyjnaha karancinu i sami zładzili sabie maksimalnuju «addalenku» chto jak zmoh. My samaizalavalisia i navučylisia pracavać z domu. Ale, kab pieražyć časovyja kardynalnyja źmieny ładu žyćcia, treba navučycca pa-novamu adpačyvać, budavać raskład i adstojvać asabistyja miežy. Voś jak usio heta rabić pravilna i chutka, piša Volha Vialička na hrodna.life.
Usio źmiašałasia
Na samaizalacyi zvykły rasparadak pracoŭnaha i asabistaha času transfarmavaŭsia. Kali pracuješ z domu, lohka pierabłytać, kali ty na pracy, a kali čas hatavać abied dla siamji.
Akramia pracy ŭ mnohich ludziej źjavilisia dadatkovyja abaviazki. Adny stali nastaŭnikami dla svaich dziaciej, inšyja — vałanciorami ŭ balnicach i pamočnikami dla pažyłych ludziej.
Jak raźmierkavać čas, kab paśpiavać usio? Jak pry hetym trymać zdarovy bałans pamiž chatnimi spravami, pracaj i svaimi asabistymi miežami?
Ja-ehaist, ja-prafiesijanał…
Pamiatajecie, u kožnaha čałavieka jość adnačasova minimum try-čatyry roli: ja-ehaist, ja-prafiesijanał, ja-baćka, ja-spadarožnik. Pryroda našaha isnavańnia nie tryvaje hvałtu i patrabuje zachavańnia bałansu pamiž rolami ŭnutry nas.
Ihnaravańnie abo nierazumieńnie svaich rolaŭ pryvodzić da niezdavolenaści, kłopatu i ahresii. Usio heta sparadžaje kanflikty. U pieršuju čarhu z tymi, chto vymušana znachodzicca z vami na adnoj terytoryi ŭ samaizalacyi.
Jašče adno śledstva parušeńnia bałansu — źnižeńnie praduktyŭnaści pracy. Stanovicca ŭsio ciažej utrymlivać kancentracyju pracoŭnych pracesaŭ u chatnich ścienach.
Praviły suprać niehatyvu doma
1. Raźmiarkoŭvajcie rabočuju i chatniuju nahruzku
Dobrym rašeńniem budzie płan na kožny dzień. Jaho možna prymacavać, naprykład, na chaładzilniku. Takoje rašeńnie daść vizualnaje razumieńnie vašaj nahruzki dla ŭsich svajakoŭ.
Taksama varta abmierkavać i skłaści ahulny płan dla ŭsioj siamji. Tak budzie jasna, dzie jość mahčymaści pravieści čas razam, a dzie — lepš nie pieraškadžać adno adnamu.
2. Rabicie rehularnyja pierapynki
Raniej my mahli sabracca z dumkami pa šlachu na pracu i z pracy. Na pracy mahli časam pieraklučycca na kavu abo čaj, pahavaryć z kalehami, patelefanavać chatnim. Siońnia nam treba šukać novyja varyjanty adciahnieńnia ad pracy. Zapłanujcie sabie nievialikija pryjemnyja piacichvilinki, jakija dazvolać być efiektyŭnymi ŭ rabocie i chatnich spravach.
3. Pamiatajecie pra asabistyja miežy
Źmiešvańnie pracy i chatnich spraŭ buryć našy miežy. Zaraz praca zabiraje viačerni čas, jaki dahetul naležyŭ našym blizkim. Nam davodzicca pracavać pa načach, my arhanizujem «ofis 24/7». Heta fatalnaja pamyłka. Paznačcie čas dla kamunikacyi sa svaimi kalehami, starajciesia pakidać svoj «chatni ofis» svoječasova. Heta dazvolić adčuvać zavieršanaść pracesu, fiksavać pramiežkavyja vyniki, aceńvać svaju efiektyŭnaść.
4. Płanujcie adpačynak dla ŭsioj siamji
Zhadajcie, što vašym blizkim i dzieciam taksama ciažka ŭ novych umovach.
Damoŭciesia, jak vy budziecie adpačyvać razam. Kali źbieraciesia abmierkavać, jak prajšoŭ dzień.
5. Filtrujcie infarmacyjny šum
U novych umovach my pierastajom adčuvać prastoru domu, jak achoŭnaj zony. Dom stanovicca miescam pieramovaŭ, zvankoŭ, pieražyvańnia rabočych stresaŭ. Treba vučycca filtravać infarmacyjny šum dla siabie i svajoj siamji.
Abmiarkujcie razam, jak heta zrabić. Mahčyma, nie varta ceły dzień słuchać televizar ci radyjo ŭ fonavym režymie, a dla sumiesnaha adpačynku možna zahadzia skłaści śpis siamiejnych filmaŭ.
6. Zhadajcie, pra što daŭno maryli
Kali raniej nie chapała času i sił na sport abo chobi, ciapier jaho lahčej znajści. Naprykład, za košt ekanomii času na darohu da pracy. Dajcie sabie mahčymaść paznavać novaje. Hadzinu času, jakaja vyzvaliłasia, možna vydatkavać na virtualnyja ekskursii ŭ suśvietnyja muziei, na cikavyja lekcyi abo novy navučalny kurs. Žyćcio praciahvajecca. Novyja ŭmovy dajuć novyja mahčymaści.
7. Vučyciesia adno ŭ adnaho
Va ŭmovach samaizalacyi my ŭsie apynulisia ŭ prykładna adnolkavych umovach. Ciapier naša siła va ŭzajemnaj padtrymcy. Kožny moža padzialicca svaimi łajfchakami i vykarystoŭvać vopyt inšych.
I pamiatajcie — być pazityŭnymi — heta nie hałoŭnaja meta samaizalacyi. Najlepšaje, što siońnia my možam — heta nie być biesturbotnymi ŭ adnosinach da pravił asabistaj hihijeny jak cieła, tak i dušy. Budźcie zdarovyja.
