Žurnalist «SB»: Karespandent Pieršaha kanała Kručynin — niedačałaviek
Dziaržaŭnaja «Sovietskaja Biełoruśsija» adreahavała na skandał z rasijskim žurnalistam «Pieršaha kanała» Alaksiejem Kručyninym, jakoha paśla repartažu sa Stoŭbcaŭ pra situacyju z karanavirusam u Biełarusi pazbavili akredytacyi i vysłali z našaj krainy.
Dźmitryj Krat.
Rabotnik «SB» Dźmitryj Krat, jaki jašče niadaŭna paraŭnoŭvaŭ niezaležnych žurnalistaŭ z «trupajedami», ciapier pajšoŭ u ataku na rasijskich prapahandystaŭ z «Pieršaha kanała».
«A apahiejem hetaj haniebnaj źjavy staŭ repartaž ź Biełarusi karespandenta rasijskaha Pieršaha kanała Alaksieja Kručynina. Toje pačućcio hidlivaści i ahidy, jakoje jon pakinuŭ, prymušaje škadavać, što ja nazvaŭ miedyjnych trupajedaŭ mienavita tak, jak nazvaŭ. Tut treba było vykarystoŭvać słova macniejšaje. Ale, bajusia, dla druku jano nie pasuje. Takim čynam, što ž vytvaryŭ hety niedažurnalist i, advažusia skazać, niedačałaviek», — piša Krat.
Dalej jon analizuje siužet rasijskich prapahandystaŭ sa Stoŭbcaŭ.
U siužecie byŭ bujny płan mahiły maładoj dziaŭčyny. Nasamreč hetaja dziaŭčyna zahinuła ŭ aŭtakatastrofie ŭ listapadzie minułaha hoda.
«Pieršymi ašukanstva zaŭvažyli supracoŭniki sieciŭnaha vydańnia «Naša Niva», jakich u vialikaj lubovi da dziaržavy nu nijak nie zapadozryš», — piša rabotnik «SB».
Dalej Krat krytykuje toje, što rasijskaja zdymačnaja hrupa zdymała mohiłki, pryčym śviežyja mahiły: heta manipulacyja, bo ŭ 17-tysiačnym horadzie kožny dzień pamirajuć ludzi.
Taksama Krat raskrytykavaŭ rasijskich prapahandystaŭ za toje, što jany nie ŭziali nivodnaha «prafiesijnaha» kamientara. Bolš za toje, žurnalist «SB» nazvaŭ Kručynina ściarviatnikam.
