U Biełarusi pačali davać rasterminoŭku na EKA
Atrymać da 10 tysiač rubloŭ možna prosta ŭ klinicy — paśla kansultacyi ŭrača-repraduktołaha. Niezvyčajnaja rasterminoŭka pavinna «palehčyć param dostup da mahčymaściaŭ dapamožnych repraduktyŭnych technałohij i dapamahčy spaznać radaści maciarynstva».
U dadzieny momant jaje možna aformić u klinicy repradukcyi i hienietyki Evaclinic IVF. Hrošy vydzialajucca na termin da 6 miesiacaŭ z mahčymaściu daterminovaha pahašeńnia. Maksimalnaja suma — 10 tysiač rubloŭ.
Padać zajaŭku na afarmleńnie rasterminoŭki možna adrazu paśla kansultacyi ŭrača-repraduktołaha. Dla razhladu zajaŭki dastatkova pašparta, rašeńnie prymajuć ciaham 30 chvilin. Aformić rasterminoŭku na siabie moža i muž, kali, skažam, jaho spadarožnica niedastatkova kredytazdolnaja.
Paśla pravierki bank zaklučaje kredytny dahavor i pierakładaje hrošy na rachunak miedycynskaj ustanovy. Pracenty pa rasterminoŭcy nie naličvajucca. Uvieś praces afarmleńnia rasterminoŭki i zaklučeńnia dahavora adbyvajecca naŭprost u klinicy — naviedvać bank dla hetaha nie patrabujecca.
«Ekstrakarparalnaje apładnieńnie — dosyć darahaja mahčymaść, tamu mnohija pryciahvajuć hrošy bankaŭ. Časta dla hetaha treba iści ŭ bank i rychtavać dakumienty. My ž vyrašyli prapanavać rasterminoŭku na EKA pa maksimalna sproščanaj schiemie i bieź pierapłaty, kab kožnaja dziaŭčyna mahła dazvolić sabie stać mamaj, niahledziačy na abstaviny», — kamientuje načalnik adździeła pa supracy z partniorami departamienta sietki prodažaŭ Banka Dabrabyt Volha Saŭčuk.
Akramia EKA, rasterminoŭka dziejničaje na prahramy viadzieńnia ciažarnaści. Jany ŭklučajuć u siabie bolš za 20 naviedvańniaŭ da akušera-hiniekołaha, łabaratornyja analizy, sieansy uhd-dyjahnostyki i inšyja miedycynskija daśledavańni.
Nahadajem, EKA — adzin ź mietadaŭ lačeńnia biaspłodździa, pryčym najbolš składany i materyjalna zatratny. Čaściej za ŭsio da jaho źviartajucca, kali ŭsie astatnija sposaby ŭžo pasprabavali, i jany nie dali žadanaha vyniku. U Biełarusi pieršaje dzicia, jakoje začali šlacham ekstrakarparalnaha apładnieńnia, naradziłasia ŭ 1995 hodzie.