Što my słuchali ŭ krasaviku — dziesiać najcikaviejšych albomaŭ miesiaca AŬDYJA
Chutka pojdzie treci miesiac žyćcia čałaviectva ŭ novych karanavirusnych umovach. Heta, kaniečnie, nie mahło nie paŭpłyvać na muzyčnuju industryju: pieranosiacca kancerty, admianiajucca fiestyvali, adkładvajucca prezientacyi albomaŭ. Niahledziačy na heta, my, jak zaŭsiody, zdoleli sabrać dziasiatku najcikaviejšych relizaŭ.
Yves Tumor — Heaven To A Tortured Mind
Amierykanski art-ekśpierymientatar napačatku krasavika prezientavaŭ svoj čaćviorty albom, natchniony rok-muzykaj.
Iŭ Ciumor nasyčaje svaje treki tajemnymi i raznastajnymi vobrazami, pry hetym pakidajučy svaju asobu zahadkavaj. Usio heta kładziecca na sumieś z hłem-roku, psichadeličnaj pop-muzyki i soŭłu.
The Strokes — The New Abnormal
Šosty ŭ dyskahrafii i pieršy za siem hod albom hurta, jaki niekali nazvali pieršymi zorkami XXI stahodździa. Jaho padrychtoŭka pačynałasia jašče ŭ 2016-m, ale novyja pieśni prychilniki The Strokes zmahli pačuć tolki letaś.
The New Abnormal raźličany na tych, dla kaho rok-n-roł — heta pierš za ŭsio muzyka, jakaja spryjaje palapšeńniu nastroju. Albom nie niasie za saboj nijakich mesedžaŭ, jaho prosta pryjemna ŭklučać i słuchać.
Tesla Boy — Andropov
Lidar Tesla Boy Anton Sievidaŭ, jaki, darečy, naradziŭsia ŭ Minsku, nazvaŭ svoj pieršy ruskamoŭny albom u honar hiensieka kamunistyčnaj partyi. Andropaŭ — heta jak miaža svabody, simvał samakantrolu: dzie my siabie spyniajem u našych pamknieńniach.
U intra da alboma słuchaču rajać rassłabicca i atrymlivać asałodu ad muzyki, jakuju natchnili savieckaja architektura, muzyka łatvijskaha hurta Zodiacs i sieryjał «Čarnobyl».
Rina Sawayama — Sawayama
Debiutny reliz brytanskaj śpiavački japonskaha pachodžańnia, jaki z roznaj śmiełaściu nazyvajuć ad alboma miesiaca da alboma hoda ŭ alternatyŭnaj pop-muzycy.
Sawayama — heta vielmi jakasny miks pop-muzyki, vajbu 90-ch, mietaličnych notak i takoj pryciahalnaj, ale časova niedasiažnaj Japonii.
Enter Shikari — Nothing Is True & Everything Is Possible
Enter Shikari zaŭsiody byli trendsetarami ŭ rok-muzycy. Jany nie bajalisia vykazvacca na palityčnyja temy i kranacca hłabalnych prablem, adnymi ź pieršych pačaŭšy ekśpierymienty z elektronnaj muzykaj.
Novy albom taksama atrymaŭsia vielmi raznastajnym i, jak zaŭsiody, poŭnym ekśpierymientaŭ. Adzin z trekaŭ, naprykład, byŭ zapisany razam z pražskim simfaničnym arkiestram.
Fiona Apple — Fetch the Bolt Cutters
Mesedž alboma, jaki źbiraje adnu ŭchvalnuju recenziju za druhoj, zastajecca adnym z samych važnych dla sučasnaha zachodniaha hramadstva.
Žančyny va ŭsim śviecie sutykajucca z hvałtam, ździekavańniami i dyskryminacyjaj u svajoj dziejnaści. I kožny trek — heta asobnaja historyja pra toje, jak žančynam treba «zhurtavacca i supraćstajać», uziaŭšy los u svaje ruki, a zaadno, i tyja samyja mientalna-emacyjnyja «kusački», kab pierastać dazvalać mužčynam daminavać i dyskryminavać.
Nürnberg — Paharda
Biełaruskamoŭny post-pank kalektyŭ viartajecca z druhim albomam, poŭnym ramantyčnaj nastalhii i krasavickaha sonca.
Pad takuju muzyku dobra jak pasumavać pa minułym lecie, tak i addacca ŭ pałon maram.
AukcYon — Miečty
Karanavirus nakłaŭ adbitak na prezientacyi adzinaccataha alboma ŭ dyskahrafii lehiendarnaha hurta.
Pa-pieršaje, va ŭmovach režymu samaizalacyi, jaki dziejničaje ŭ Maskvie, byli źniatyja dva klipy. A pa-druhoje, prezientacyja alboma prajšła ŭ režymie internet-strymu, padčas jakoha muzyki syhrali novyja pieśni, a taksama adkazali na pytańni prychilnikaŭ.
Trivium — What The Dead Men Say
Kančatak krasavika adznačyŭsia vychadam dvuch važkich albomaŭ u ciažkaj muzycy. Pieršy — dziaviataja płaścinka amierykanskich mietalistaŭ z Trivium.
Jak zaŭsiody adbyvajecca z navinkami ŭ hetym muzyčnym napramku, mierkavańni słuchačoŭ padzialilisia: adny paličyli albom zanadta ciažkim, druhija — što ŭ im šmat usiaho lišniaha, trecim usio padabajecca.
Tolki čas pakaža sapraŭdnuju moc What The Dead men Say.
DRYHVA — Vajdełot
«Niby ahoń, my zapalvajemsia, harym jarka i niepaźbiežna zhasajem…»
Vajdełotami nazyvali pahanskich žracoŭ, jakija słužyli na kapiščach i źjaŭlalisia ŭ pieršuju čarhu zachavalnikami śviaščennaha ahniu. Kali pa ich vinie źnič zhasaŭ, ich samich spalvali na novym ahni.
Doŭhija dziesiać hadoŭ raździalili pieršy i druhi albom adnaho z najlepšych ajčynnych hurtoŭ žanru pahan-mietał. Viartańnie adbyłosia vielmi mocnym.
A što vy słuchali z muzyčnych navinak?
Našy papiarednija ahlady:
