Na adzin sa zvanoŭ Žyrovickaha manastyra nanieśli imiony Łukašenki i Pucina
Pra heta raspavioŭ pasoł Rasii ŭ Biełarusi Dźmitryj Mieziencaŭ u intervju «KP v Biełarusi».
U Śviata-Uśpienskim Žyrovickim mužčynskim manastyry płanujuć uźvieści novuju 57-mietrovuju zvanicu z 12 zvanami. Hety prajekt finansujecca bankam VTB (Biełaruś) pry ŭdziele hubiernatara Śviardłoŭskaj vobłaści Kujvašava, kiraŭnikoŭ Varoniežskaj i Naŭharodskaj abłaściej Husieva i Nikicina.
Užo zavieršana budaŭnictva časovaj zvanicy, dzie da momantu ŭźviadzieńnia asnoŭnaj buduć zachoŭvacca zvany, jakija byli adlityja na Varoniežskim zvanočnym zavodzie ŭ krasaviku.
Pasoł paviedamiŭ, što inicyjatyvu padtrymała kiraŭnictva Biełarusi, upaŭnavažany pa spravach relihij Leanid Hulaka, Ministerstva kultury, śpiecyjalisty ŭ halinie achovy pomnikaŭ.
Mieziencaŭ adznačyŭ, što infarmavaŭ ab prajekcie kiraŭnika Biełarusi letaś vosieńniu. Pasoł paćvierdziŭ, što na vialikim zvonie jość imiony Łukašenki i Pucina.
«U bronzie raŭnapraŭna adlityja słovy: «Apiakunstvam Prezidenta Respubliki Biełaruś Alaksandra Ryhoraviča Łukašenki, Prezidenta Rasijskaj Fiederacyi Uładzimira Uładzimiraviča Pucina», — skazaŭ jon.
Aśviačeńnie zvanoŭ płanujecca pravieści 20 maja.