Navukoŭcy paćvierdzili efiektyŭnaść remdzisiviru ŭ lačeńni karanavirusa
Maštabnyja kliničnyja vyprabavańni antyvirusnaha preparata remdzisivir paćviardžajuć jaho efiektyŭnaść u baraćbie z karanavirusnaj infiekcyjaj Covid-19, piša Bi-Bi-Si.
Daśledavańnie praciahvajecca, pakul padviedzieny tolki jaho papiarednija vyniki. Adnak jany byli dastatkova pierakanaŭčymi dla taho, kab Nacyjanalny instytut alerhii i infiekcyjnych zachvorvańniaŭ ZŠA (NIAID) zrabiŭ z hetaj nahody admysłovuju zajavu, jakaja paćviardžaje efiektyŭnaść preparata.
«Danyja śviedčać, što remdzisivir akazvaje adnaznačny, istotny, pazityŭny efiekt, paskarajučy vyzdaraŭleńnie», — zajaviŭ žurnalistam kiraŭnik NIAID Entani Faŭčy.
U ekśpierymiencie, jaki pačaŭsia bolš za dva miesiacy tamu, 21 lutaha, biaruć udzieł bolš za 1000 pacyjentaŭ z ZŠA, Azii i Jeŭropy z paćvierdžanym dyjahnazam Covid-19.
Daśledčyki vykarystoŭvajuć mietad padvojnaha ślapoha testavańnia: chvorych dzielać na dźvie hrupy, u adnoj ź jakich pacyjenty atrymlivajuć remdzisivir (u dadatak da zvyčajnaha simptamatyčnaha lačeńnia), a ŭ druhoj — płaceba. Pry hetym, u jakoj z hrup znachodzicca toj ci inšy kankretny pacyjent, nie viedaje ni jon sam, ni jaho lekary.
Pa papiarednich źviestkach, chvoryja, jakija prymajuć ekśpierymientalny preparat, zdaraviejuć amal u paŭtara razy chutčej — u siarednim za 11 dzion, suprać 15 u pacyjentaŭ z kantrolnaj hrupy.
Jość roźnica i ŭ pakazčykach śmiarotnaści, choć i nie takaja istotnaja: u kantrolnaj hrupie pamierła 11,6% chvorych, u ekśpierymientalnaj — 8%.
Kali kančatkovyja vyniki daśledavańnia nie buduć mocna razychodzicca ź jaho pramiežkavymi vynikami, remdzisivir stanie pieršym lekam, jaki paśpiachova prajšoŭ kliničnyja vyprabavańni suprać Covid-19.
Śpiecyfičnaj terapii suprać karanavirusu pa-raniejšamu nie isnuje. Pacyjentam akazvajuć tolki simptamatyčnuju dapamohu, heta značyć baraćba idzie nie z samoj infiekcyjaj, a ź jaje prajavami.
«Ciapier u nas dastatkova infarmacyi, kab razhledzieć mahčymaść u ekstranym paradku dazvolić lekaram vykarystoŭvać [remdzisivir]», — napisaŭ u «Tvitary» były kiraŭnik Upraŭleńnia pa sanitarnym nahladzie za jakaściu charčovych praduktaŭ i miedykamientaŭ Skot Hotlib.
Cikava, što litaralna na dzień raniej u časopisie Lancet byli apublikavanyja vyniki inšaha daśledavańnia pa praviercy ŭpłyvu remdzisiviru na karanavirus. Ekśpierymient pravodziŭsia ŭ Kitai i byŭ zavieršany z procilehłym vynikam: efiektyŭnaść preparata dakazać nie ŭdałosia.
Adnak ekśpierty adznačajuć, što kitajskaje daśledavańnie, praviedzienaje ŭsiaho na 237 pacyjentach, nie źjaŭlajecca dastatkova reprezientatyŭnym, kab rabić padobnyja vysnovy. Ekśpierymient navat pryjšłosia daterminova spynić — u pryvatnaści, praź niedachop udzielnikaŭ.
