«Pamierłych z pryčyny pnieŭmanii niama»: staŭbcoŭskaja rajonka apublikavała ŭłasny materyjał pra zachvorvańni ŭ rajonie
Fota Radyjo Svaboda
Staŭbcoŭskaja aficyjnaja hazieta «Pramień» apublikavała vialiki materyjał za podpisam hałoŭnaha redaktara Neli Astrejka, dzie sprabuje adkazać na publikacyi pra Stoŭbcy ŭ internecie.
«Zahałoŭki niekatorych internet-resursaŭ nahadvajuć zvodki z paloŭ Vialikaj Ajčynnaj vajny. Na jakoj kanapie jany naradžajucca i jakich sieryjałaŭ nahladzielisia ich aŭtary, zastajecca tolki zdahadvacca, — pačynaje hałoŭny redaktar. — Jaskravy prykład nievuctva na hetym tydni demanstruje adzin z resursaŭ prystaličnaha rehijonu: «Stoŭbcy stali novym epicentram karanavirusa. Kolkaść pamierłych užo pieravysiła adzin dziasiatak … Miascovaja balnica pierapoŭnienaja, a kojkami zastavili navat stałovuju…» Rabiaty, vy surjozna? Sa śmierciu i chvarobaj nie žartujuć, ale tut takoje ŭražańnie, što piša školnik, jaki ŭjaŭlaje sabie balnicu jak niešta siaredniaje pamiž amierykanskim błokbastaram i svajoj ža škołaj. Niama ŭ špitalach vielizarnych stałovych — ad słova zusim!»
Ale zrazumieć realnyja ličby z materyjała składana.
«U balnicy ź pieršaha dnia pastupleńnia pacyjenta z COVID-19 pravodzicca sartavańnie ź pnieŭmanijami ŭ zaležnaści ad ciažaru stanu čałavieka: ciažkija, kisłarodazaležnyja, niaciažkija. Zhodna z raspracavanym płanam z ulikam taho, što z 30 sakavika pa 13 krasavika ŭ balnicu išło aktyŭnaje pastupleńnie chvorych ź ciažkimi pnieŭmanijami, dla akazańnia apieratyŭnaj dapamohi ich pačali pieravodzić u inšyja rajony. Tak, pacyjenty sa Stoŭbcaŭ atrymlivajuć dapamohu ŭ Kapyli, Vałožynie, Marjinaj Horcy, Salihorsku i na abłasnym uzroŭni.
Z 17 krasavika situacyja stabilizavałasia. Zaraz pnieŭmanii aktyŭna vyjaŭlajucca ŭ bolšaści vypadkaŭ u tych pacyjentaŭ, jakija ŭžo znachodziacca na balničnym, čaściej za ŭsio pry paŭtornych ahladach.
Pieraviedziena z reanimacyjnaha adździaleńnia 8 pacyjentaŭ. Znachodziacca zaraz na etapie padrychtoŭki da vypiski 14 pacyjentaŭ ź pnieŭmanijami.
Pamierłych z pryčyny pnieŭmanii va UAZ «Staŭbcoŭskaja CRB» niama.
«Što tyčycca temy pavyšanaj śmiarotnaści ŭ rajonie, to vielmi raim kanapnym błohieram pavyvučać statystyku. Hetamu, darečy, vučać va ŭniviersitetach — nie vydavać niepravieranuju infarmacyju», — zaznačaje hałoŭny redaktar.
«Za pieryjad sa studzienia pa sakavik 2019 hoda ŭ rajonie było zarehistravana 254 pamierłych, a za hety ž pieryjad 2020 hoda - 241 pamierły. Vysnovy, jak toj kazaŭ, rabicie sami…»
«Adznačym taksama, što z 1 krasavika ŭžo 30 pacyjentaŭ ź pnieŭmanijami skončyli lačeńnie, za tydzień zakryty 383 listki niepracazdolnaści pa pryčynie VRVI i vostraha branchitu».
«I ŭličvajučy, što mnohija kanapavyja błohiery telefanujuć hałoŭuraču i pytajucca: ci nie ŭciok ŭvieś miedycynski piersanał za miažu, adkazvajem — nie, nie ŭciok. Balnica pracuje stabilna. Tak, biezumoŭna, składana i ciažka. Viadoma ž, jość paćvierdžany COVID-19 i siarod miedrabotnikaŭ, i ŭ pacyjentaŭ. Ale na siońniašni dzień usie adčuvajuć siabie zdavalniajuča. Srodkami abarony: kaściumami, reśpiratarami, maskami, ščytkami — miedrabotniki zabiaśpiečany ŭ poŭnym abjomie», — skančaje materyjał Neli Astrejka.
U Stoŭbcach šmatlikija śmierci ad pnieŭmanij i karanavirusa. Raskazvajuć svajaki
U Stoŭbcach pamierła 71-hadovaja žančyna: była «karona», ale aficyjnaja pryčyna śmierci inšaja
