Minzdaroŭja Čechii: Najhoršaje praduchilili, možam viartacca da narmalnaha žyćcia
Adam Vojciech, ČTK
Niekantralavany raspaŭsiud COVID-19 u Čechii spynieny, i ŭłady mohuć pačynać padrychtoŭku da pastupovaha viartańnia da narmalnaha žyćcia. Pra heta ŭ sieradu, 8 krasavika, zajaviŭ ministr achovy zdaroŭja Adam Vojciech, paviedamlaje «Radyjo Svaboda».
Pavodle analizu ministerstva, da kanca krasavika kolkaść pacyjentaŭ z karanavirusam u krainie dasiahnie 10600 čałaviek. Pry hetym dva tydni tamu ministerstva prahnazavała lik u 14000 čałaviek. Heta aznačaje, što pryniatyja miery dali efiekt.
«Naviny pazityŭnyja. Češskaja Respublika praduchiliła horšy scenar, jaki adbyŭsia, naprykład, u Italii, Hišpanii ci ZŠA. Nam udałosia spynić niekantralavany raspaŭsiud zachvorvańnia i abaranić svaju sistemu achovy zdaroŭja ad pierahruzki. Ciapier my možam rychtavacca da pastupovaha viartańnia da narmalnaha žyćcia», — skazaŭ Vojciech.
Pavodle jaho słoŭ, raspracoŭka adpaviednaha płana ŭžo pačałasia. Na dumku ministra, chutkaha viartańnia da raniejšaha žyćcia nie budzie. Nasić maski i i zachoŭvać sacyjalnuju dystancyju ŭ dva mietry, daviadziecca jašče niekalki tydniaŭ abo i miesiac.
«My nie pavinny dapuścić, kab usio, čaho my damahlisia za hety čas, adpraviłasia ŭ śmietnik. Nie možam dapuścić prychodu druhoj chvali epidemii», — dadaŭ Vojciech.
Čechi była adnoj ź pieršych u Jeŭropie, jakaja abviaściła nadzvyčajnaje stanovišča ŭ sakaviku, ustanaviŭšy strohija abmiežavańni, kab praduchilić raspaŭsiud karanavirusa.
