Praz karanavirus biełarus zachras u Mali: jak jon vyžyvaje ŭ Afrycy
39-hadovy Alaksandr Miadźviedzieŭ — zaŭziaty padarožnik. Jon naviedaŭ užo 75 krain śvietu. U pačatku lutaha Alaksandr pačaŭ ź Bienina vialikaje padarožža pa Zachodniaj Afrycy, skončyć jaho płanavaŭ letam u Maŭrytanii.
Ale ŭ płany ŭmiašałasia situacyja z karanavirusam. Zakryćcio hranic zaśpieła biełarusa ŭ stalicy Mali, horadzie Bamaka. Na hety momant Miadźviedzieŭ nie maje mahčymaści kudyści vyjechać z krainy, ale nie ŭpadaje ŭ rospač.
«Ja prahramist, ale pakul biespracoŭny, tamu i atrymaŭ mahčymaść pavandravać. U Afrycy ja byvaŭ i raniej, ale ŭ inšych rehijonach. Jana vabiła ź dziacinstva. Naviedvać krainy treciaha śvietu mnie značna cikaviej za cyvilizavanyja», — kaža Alaksandr.
Na vulicach Bamaka.
Za čas hetaj vandroŭki Miadźviedzieŭ paśpieŭ naviedać Bienin, Nihier, Burkina-Faso, Toha, Kot-dJIvuar i Mali.
«Bienin — heta takaja turystyčnaja kraina, šmat usiaho źviazana z relihijaj vudu, słužeńni, vielmi pryhožyja plažy. U Nihiera kiepskaja reputacyja ŭ płanie biaśpieki, ja tam nie bačyŭ biełych turystaŭ. Pierasoŭvaŭsia bolš-mienš spakojnymi maršrutami, tamu prablem nie było. U Burkina-Faso byŭ na dvuch fiestyvalach. Adzin ź ich — fiestyval masak, jaki prachodzić raz na dva hady. Raniej kraina była turystyčnaj, ale ciapier tam navat lišni raz lepš nie dastavać fotaaparat. Na poŭnačy krainy idzie vajna, tamu situacyja nie vielmi dobraja. U Toha taksama kult vudu, plažy, pryhožyja afrykanskija vioski, hory. Kraina turystyčnaja. Vizu ŭ Hanu mnie nie dali, tamu palacieŭ samalotam u Kot-dJIvuar. Tam mianie ŭraziŭ vializny katalicki chram, bolšy za baziliku Śviatoha Piatra ŭ Vatykanie, u Jamusukra. Horad staić pusty i tam uzvyšajecca taki kaścioł», — karacieńka Alaksandr apisaŭ naviedanyja krainy.
Raka Nihier.
Ad kanca sakavika Alaksandr znachodzicca ŭ Mali. «Karanavirusa tut asabliva niama, kažuć pra dva novyja vypadki ŭ dzień [aficyjna ŭ Mali 47 chvorych, 5 čałaviek pamierli — «NN»]. Tamu režym tut dastatkova miakki, asablivych abmiežavańniaŭ niama. Sprava ŭ tym, što 19 krasavika projduć parłamienckija vybary. Isnuje kamiendanckaja hadzina ad 21 viečara da 5 ranicy. Zakryli kinateatry, zabaranili mitynhi chiba što. U tym ža Kot-dJIvuary stalicu prosta zabłakavali i adrezali ad inšaj častki krainy, a ŭ Mali takoha niama. Tym nie mienš, peŭnaja napružanaść isnuje, bo ŭsie miascovyja hladziać francuzskija telekanały, dzie šmat havorycca na temu karanavirusa».
Žychary Mali.
U niekatorych azijackich krainach, naprykład, Šry-Łancy, źmianiłasia staŭleńnie da jeŭrapiejcaŭ, jakija ličacca raspaŭsiudnikami zarazy. A jak u hetym płanie spravy ŭ Afrycy?
«Jość hrupa ŭ fejsbuku, dzie abjadnanyja turysty ź Jeŭropy, jakija nie mohuć vyjechać z Afryki, dyk tam časam skidvajuć dopisy ŭ sacyjalnych sietkach z padobnym źmiestam. Časam ludzi šarachajucca ad ciabie, ale nijakaj ahresii ja nie sustrakaŭ».
Stadyjon u Bamaka.
Alaksandr Miadźviedzieŭ źviazvaŭsia ź biełaruskim pasolstvam u Łahasie (Nihieryja), jany pieranakiravali mužčynu na rasijskaje pradstaŭnictva ŭ Mali. «Razmaŭlaŭ z rasijskim ataše, mnie skazali, što kali jość u samalocie miescy, to jany zabirajuć hramadzian SND: Biełarusi, Kazachstana. Nakolki ja viedaju, na siońnia ŭ Mali znachodziacca šaściora rasijan: troje pa biznesie i troje turystaŭ. Zrazumieła, što hnać samalot dziela šaści čałaviek nichto nie źbirajecca. Turysty spačatku žyli ŭ hateli, a ciapier znachodziacca na terytoryi pasolstva. Nakolki ja viedaju, umovy dla žylla tam nie duža dobryja. Pra inšych biełarusaŭ, aproč siabie, u Zachodniaj Afrycy ciapier ja nie čuŭ», — kaža vandroŭnik.
Źniać hatel u Bamaka budzie kaštavać kala 50 dalaraŭ za sutki — heta nie samaja tannaja zabava. Miadźviedzieŭ tłumačyć heta nieturystyčnym statusam krainy, u tym ža Bieninie ci Toha žyllo našmat tańniejšaje. U Alaksandra atrymałasia źniać kvateru praz partał Airbnb, heta jamu kaštuje kala 15 dalaraŭ za noč.
Tak vyhladaje kvatera Alaksandra ŭ Bamaka.
«Umovy niebłahija: jość vaj-faj, anhłamoŭnyja telekanały pa televizary, choć heta i nie centr. Vychodžu raz na dzień pa ježu. Pajeści ŭ restaranie kaštuje nie mienš za 10 dalaraŭ, vuličnaja ježa — 4-5 dalaraŭ. Vuličnaja ježa — heta kuryca i bulba zvyčajna».
Strytfud Mali.
«Bolšaść nasielnictva Bamaka — biedniaki, jak i ŭ inšych afrykanskich krainach, ale chapaje i bahatych ludziej. Naprykład, ja zachodziŭ u adnu z haścinic u Kot-dJIvuary, i tam staić «Koka-koła» pa 5 dalaraŭ. I pjuć ža jaje afrykancy. Afryka cikavaja dla vandrovak, ale nie dla žyćcia tut. Toj ža Bamaka — heta pylny horad. Tut jość zaapark, park, znajšoŭ punkt, dzie možna bačyć horad źvierchu, zabaŭ nie tak šmat».
Na vulicach Bamaka.
Poŭnač Mali kantralujuć terarysty, tam niaredka adbyvajucca vajennyja dziejańni. Alaksandra papiaredzili, što tudy lepš nie sovacca. Dniami biełarus praciahnuŭ na miesiac u palicyi svaju vizu ŭ Mali. Heta kaštavała 25 dalaraŭ.
Pryroda Mali.
«Ja nie panikuju. Hrošaj pavinna chapić na 5-6 miesiacaŭ. Spadziajusia, za hety čas miežy ŭsio ž adkryjuć. I ŭ mianie atrymajecca dabracca da Maŭrytanii, a adtul da Jeŭropy. Ciapier hladžu televiziju pa-anhlijsku, čytaju knižku na anhlijskaj movie. Padciahvaju svajo vałodańnie hetaj movaj. Usio dobra», — adznačaje Alaksandr Miadźviedzieŭ.
Mali
Kraina ŭ Zachodniaj Afrycy. Była francuzskaj kałonijaj. Niezaležnaść atrymała ŭ 1958 hodzie. Nasielnictva — 19 miljonaŭ. Adna z najbiadniejšych krain śvietu pa VUP na dušu nasielnictva. 90% nasielnictva Mali — musulmanie-sunity, 3% — kataliki, 2% — chryścijanie inšych kanfiesij, 5% — prychilniki tradycyjnych afrykanskich vieravańniaŭ. U 2012 hodzie poŭnač Mali zajaviła, što budzie dabivacca niezaležnaści rehijona z nazvaj Azavad. Za hetym paŭstańniem stajała kačeŭnickaja narodnaść tuarehaŭ, a taksama miascovyja isłamisty. Ciaham pary miesiacaŭ paŭstancam atrymałasia zavajavać bolšuju častku krainy, pryčym ź niekalkimi vajskovymi bazami. Ź ciaham času isłamisty całkam vycisnuli tuarehaŭ i stali kantralavać terytoryju. Praŭda, jany ž potym zajavili, što admaŭlajucca ad niezaležnaści na karyść šyrokaj aŭtanomii. Faktyčna na poŭnačy krainy isnavaŭ musulmanski emirat, jaki žyŭ pa zakonach šaryjatu. U pačatku 2013 hoda pry dapamozie francuzskich vojskaŭ isłamistaŭ prymusili zdacca, tym nie mienš bajavyja dziejańni tam adbyvajucca pa siońnia.
