«Takoje nielha rekamiendavać»: ministr zdaroŭja Rasii paspračaŭsia z Łukašenkam pra karyść harełki pry karanavirusie
Tytuń i ałkahol nie dapamahajuć źnizić ryzyku zachvorvańnia, vyklikanaha novaj karanavirusnaj infiekcyjaj, zajaviŭ ministr achovy zdaroŭja Michaił Muraška, paviedamlaje Interfax.
«Heta nie tak», — skazaŭ Muraška ŭ efiry «Pieršaha kanała» ŭ intervju žurnalistu Uładzimiru Poźnieru, kamientujučy čutki, što nibyta mocny ałkahol i tytuń «zabivajuć hety karanavirus».
«Pryčym pa ałkaholu — tut ja prosta prasiŭ by navat, źviartajučysia da hramadzianaŭ našaj krainy, heta i ŭ papiarednija pieryjady ŭzdymu zachvorvańnia było: sproba lačyć heta ŭsio ałkaholem, zaciahvańnie mier miedycynskich adnaznačna pryvodzić da bolš horšaj situacyi, pacyjent pastupaje, kali ŭžo vyratavać nielha», — adznačyŭ ministr.
Jon taksama nie pahadziŭsia z rekamiendacyjaj Alaksandra Łukašenki, jaki, pa paviedamleńniach ŚMI, paraiŭ jeści tłustuju ježu i vypić čarku harełki.
«U mianie jość karani ź Biełarusi, ja, mabyć, mahu paspračacca ŭ hetaj situacyi. Mnie zdajecca, heta nielha rekamiendavać», — skazaŭ rasijski ministr achovy zdaroŭja.
Raniej Alaksandr Łukašenka «prapisaŭ» biełarusam ad karanavirusa harełku, łaźniu i ciažkuju pracu. «Čaściej myjcie ruki, svoječasova śniedajcie, abiedajcie i viačerajcie. Ja čałaviek niepituščy, ale ŭ apošni čas žartam kažu, što harełkaj treba nie tolki ruki myć, ale i, napeŭna, u dzień 40-50 hram u pieraliku na čysty śpirt, travić hety virus. Ale nie na pracy», — skazaŭ Łukašenka 17 sakavika.
