Što my słuchali ŭ sakaviku — dziesiać najcikaviejšych albomaŭ miesiaca AŬDYJA
Miełamanam na karancinie było nie sumna, bo ŭ sakaviku vyšła dastatkova cikavych relizaŭ, kab zadavolić apietyty navat samych patrabavalnych słuchačoŭ. Dziasiatka najbolš cikavych navinak — u našym tradycyjnym ahladzie.
Phantogram — Ceremony
Ceremony — čaćviorty albom elektronnaha dueta i adnačasova novaja častka tvorčaści Phantogram. Zmročnaja, ale poŭnaja nadziei.
Salistka dueta Sara Barteł pieražyła śmierć siastry, što adbiłasia na jaje novych pieśniach. Jak jana miarkuje, u kožnaha čałavieka — svaja ŭłasnaja cyrymonija.
Super Besse — Un Rêve
Biełaruskija post-panki zapisali dzieviać piesień na ruskaj movie pra samaidentyfikacyju i isnavańnie ŭ maleńkim śviecie. Kab dadać novaha ŭ svoj saŭnd, Super Besse pačali ruchacca ŭ bok elektroniki, ale z tym raźlikam, kab zastacca ŭ svaim styli.
Čytać taksama:
Hety hurt viarnuŭ modu na post-pank u Biełarusi. Novyja pieśni i najlepšyja chity Super Besse ŭ žyvym vystupie VIDEA
Peter Bjorn and John — Endless Dream
Šviedski hurt, viadomy svaim pazityŭnym indy-popam, adśviatkavaŭ 20-hodździe vychadam vośmaha alboma. Jarkija i pazityŭnyja miełodyi zdajucca krychu niedarečnymi siońnia.
Ale dla tych, chto choča na niekatory čas schavacca ad ciemry, takaja muzyka stanie znachodkaj. Niepaŭtorny lohki vakał, recha psichadelii i teksty, jakija pieranosiać ŭ inšaje miesca i čas. Šukajcie kolery ŭ siońniašnim ciomnym śviecie.
Die Antwoord — House Of Zef
Biez papiarednich anonsaŭ Die Antwoord pradstavili svoj piaty albom, jaki musić stać apošnim u bahataj muzyčnaj karjery paŭdniovaafrykancaŭ.
Novy albom Die Antwoord — heta nie sproba ŭ čarhovy raz uskaraskacca na muzyčnyja viaršyni, a žadańnie pieradać ściah inšym talenavitym ziemlakam. Łonhpłej zapisany pry ŭdziele paŭdniovaafrykanskich vykanaŭcaŭ, pra jakich Die Antwoord zachacieli raspavieści śvietu.
The Weeknd — After Hours
Praz dva tydni paśla relizu ŭžo možna kazać pra pośpiech alboma: sinhł «Heartless» uznačaliŭ Billboard Hot 100, a trek «Blinding Lights» apynuŭsia na pieršym radku brytanskaha čarta.
The Weeknd u novym albomie bałansuje pamiž luboŭju da estetyki i ambicyjami starboja. Heta hlancavy i vizualna biezdakorny reliz.
Childish Gambino — 3.15.20
Amierykanski repier Childish Gambino, jon ža akcior Donald Hłovier, vypuściŭ svoj novy albom, jaki atrymaŭ nazvu 3.15.20.
15 sakavika reliz byŭ prezientavany jak internet-strym, ale nieŭzabavie jon byŭ vydaleny. 22 sakavika albom byŭ apublikavany znoŭ, na hety raz aficyjna.
Cikava, što nazvy trekaŭ — heta tajmkody poŭnaha zapisu alboma z taho samaha stryma, a nazva alboma — data, kali tranślacyja źjaviłasia na sajcie Hłoviera.
Dua Lipa — Future Nostalgia
Paśla atrymanaha letaś «Hremi» ŭ naminacyi «Najlepšy novy vykanaŭca» možna było padumać, što Dua Lipa nie zmoža paŭtaryć pośpiech pieršaha alboma.
Kab paźbiehnuć kryzisu idej i samapaŭtoru, brytanka z kosaŭskimi karaniami vydała retra-płytku z badziorymi dyska-trekami ŭ styli 80-ch.
DachaBracha — Alambari
Ukrainski etna-fołk hurt vypuściŭ albom, zapisany ŭ Brazilii.
«Alambari — naša brazilski prypynak… Choć u hetym materyjale niama čysta brazilskaj aŭtentyčnaści, nichto nie viedaje, jak terytoryja i miascovaść paŭpłyvali na nas padčas zapisu. Takim čynam, naša padarožža praciahvajecca», — tak prakamientavali reliz muzyki DakhaBrakha.
Nicolas Jaar — Cenizas
Čylijski dydžej i pradziusar Nicolas Jaar, jaki ciapier žyvie ŭ ZŠA, vypuściŭ novy albom pad nazvaj Cenizas na ŭłasnym łejble Other People.
Heta čaćviorty pa liku albom artysta, u jakim jon zrabiŭ staŭku na ambient-hučańnie z nalotam industryjalnaha minimalizmu.
Pearl Jam — Gigaton
Pieršy za siem hadoŭ i adzinaccaty ŭ ahulnaj dyskahrafii albom pijanieraŭ hranžu.
«Heta było doŭhaje padarožža. Zmročny emacyjanalna, ale taksama zachaplalny i ekśpierymientalny šlach da muzyčnaha zbavieńnia. Praca z maimi tavaryšami pa hrupie padaryła mnie vialikuju luboŭ, uśviadomlenaść i razumieńnie taho, jak ludziam nieabchodnaja suviaź u hetyja časy», — raspavioŭ ab pracy nad albomam hitaryst Pearl Jam Majk MakKrydzi.
A što vy słuchali z muzyčnych navinak?
Našy papiarednija ahlady:
