«A jak možna žyć sa 135 kh vahi?» Syn pamierłaha piensijaniera adkazaŭ uładam na hetuju frazu
2 krasavika ŭ Viciebsku paśla piaci dzion u reanimacyi pamior vajenny piensijanier Uładzimir Sidaraŭ, dva miesiacy tamu jamu spoŭniłasia 70. Asnoŭnaj pryčynaj śmierci, pavodle paśviedčańnia, staŭ karanavirus. Syn, ubačyŭšy, jak śmierć baćki prakamientavali hubiernatar vobłaści i Łukašenka, paprasiŭ Tut.by apublikavać jaho adkaz.
Nahadajem, u siaredzinie sakavika mužčyna prachodziŭ lačeńnie ŭ adździaleńni chirurhii, adkul jaho z tempieraturaj vypisali dadomu — dalačyć hryp. Nieŭzabavie jaho pryvieźli ŭ tuju ž balnicu na chutkaj z dvuchbakovaj pnieŭmanijaj, test na COVID-19 byŭ stanoŭčym. Žonka pamierłaha, dačka i jaje siamja znachodziacca pad nahladam lekaraŭ (u žonki taksama pnieŭmanija i karanavirus).
Voś jak śmierć vajennaha piensijaniera Sidarava 2 krasavika prakamientavaŭ Łukašenka:
— Šarśnioŭ [hubiernatar Viciebskaj vobłaści] učora mnie dałažyŭ, apošni vypadak u jaho byŭ. Pytajusia: «Nu čamu hety ŭ ciabie pamior?» A jon kaža: «Alaksandr Ryhoravič, a jak možna žyć sa 135 kh vahi?» Serca amal nie pracuje, heta nie pracuje, heta balić, toje balić, bukiet chvarob. I virus atakuje słabych, u jakich niama imunitetu, nu i jamu za 70 hadoŭ było.
Andrej, syn Uładzimira Siarhiejeviča, vyrašyŭ adkazać uładam:
— Ścisła, kim byŭ moj baćka, — piša Andrej Sidaraŭ, syn pamierłaha. — Uładzimir Siarhiejevič naradziŭsia 4 lutaha 1950 hoda ŭ Miorskim rajonie Viciebskaj vobłaści. Jamu było «za 70». Jaho baćki — frantavik z kulavym ranieńniem u hrudzi pražyŭ «za 70», i maja babula, taksama sa statusam «udzielnik bajavych dziejańniaŭ», pražyła daŭžej. Baćka, advučyŭšysia paśla škoły ŭ Čarnamorskim vyšejšym vajenna-marskim vučyliščy, słužyŭ na Paŭnočnym fłocie, byŭ kamandziram karabla ź jadziernaj zbrojaj na borcie. U 90-ch u siłu viadomych pryčyn demabilizavaŭsia ŭ tady ŭžo Respubliku Biełaruś, u Viciebskuju vobłaść, dzie pracavaŭ da vychadu na piensiju. Na piensii, jak i bolšaść piensijanieraŭ, zajmaŭsia aharodnictvam na dačy, dobra hulaŭ u šachmaty, vychoŭvaŭ unukaŭ, lubiŭ aŭtamabili, rehularna chadziŭ u basiejn i byŭ tavaryskim čałaviekam. Da kanca svaich dzion prymaŭ vinšavańni i padziaki z usich krain byłoha SSSR ad sotniaŭ matrosaŭ, mičmanaŭ, aficeraŭ, jakija słužyli pad jaho kamandavańniem, i ich baćkoŭ. Ščyra vaš, syn Baćki.
