Va ŭsim śviecie puściejuć prytułki dla žyvioł. U Biełarusi situacyja, naadvarot, pahoršyłasia
U apošni čas z mnohich krain śvietu, dzie aficyjna ŭviedzieny karancin, prychodziać źviestki ab apuścieńni prytułkaŭ dla žyvioł, jakich ludzi zabirajuć damoŭ, kab supakoić niervy va ŭmovach pandemii. «Naša Niva» spytała ŭ biełaruskich prytułkaŭ, ci pavialičyŭsia popyt na hadavancaŭ siarod biełarusaŭ u razhar karanavirusa.
«Uzrovień zabirańnia žyvioł u našym prytułku nie vyras, a, naadvarot, pamienšyŭsia, — raskazvajuć u hramadskim abjadnańni achovy žyvioł «Ehida».
Adzinaje, što źmianiłasia ŭ prytułku — prapanoŭ pieratrymki žyvioł, jakija šukajuć novy dom, pastupaje krychu bolš, čym zvyčajna. Aficyjna karancin u Biełarusi nie ŭviedzieny, ale niekatoryja mohuć dazvolić sabie syści na samaizalacyju i patrymać u hety čas hadavancaŭ u siabie.
«Ciapier stała składaniej znajści fizičnuju dapamohu dla žyvioł, vałancioraŭ, jakija b ich dahladali. Z prychodam karanavirusa ludzi stali jašče mienš źviartać uvahu na prablemu biazdomnych žyvioł, tamu što vialikija prablemy paŭstali ŭ samich ludziej, — dadajuć u «Ehidzie».
U prytułku dla katoŭ «Kot u vakiency» taksama adznačajuć, što pika zacikaŭlenaści ŭ žyviołach nie nazirajuć:
«Viasnoj kožny hod žyvioł pačynajuć bolš aktyŭna raźbirać. Ale nie našmat. Karanavirus prosta supaŭ z hetym pieryjadam», - raskazvajuć u prytułku.
U hramadskim abjadnańni achovy žyvioł «KiS» raspaviali «Našaj Nivie», što ciapier usie prytułki źbiantežanyja, što rabić z žyviołami, čyich haspadaroŭ pakłali ŭ balnicu praz karanavirus.
«Da nas pakul takich pytańniaŭ nie pastupała, ale my rychtujemsia da horšaha, - raskazali ŭ «KiS». - Vałancioraŭ, jakija mahli b dahladać žyvioł padčas pandemii, my vydzialić čałavieku nie možam. Zabrać ich žyvioł da siabie - taksama, tamu što miescaŭ na ŭsich nie chapaje.
Va ŭsich prytułkach adznačajuć, što drenna ŭjaŭlajuć, što budzie z žyviołami, kali ŭ krainie ŭviaduć karancin.
«Popyt na žyvioł mocna padaje. Zabrać žyviołu - heta i tak adkaznaść, jakuju treba ŭzvažvać. A ŭ ciapierašniaj abstanoŭcy ludzi naohuł nie razumiejuć, što im rabić.
Finansavaja situacyja niestabilnaja. Na žyviołu treba vydatkoŭvać hrošy, jaje treba karmić, dahladać.Ale i samim ludziam treba niejak vyžyvać.
Tak, my viedajem, što ŭ prytułkach Polščy, Italii, ZŠA žyvioł aktyŭna raźbirajuć. Ale chočacca vieryć, što paśla karancinu ich nie viernuć nazad u prytułki».
