Jakija chraničnyja chvaroby asabliva niebiaśpiečnyja ŭ časy karanavirusa
Astma i chraničnyja zachvorvańni lohkich
Padčas prystupu astmy nabrakaje ślizistaja abałonka bronchaŭ, dychalnyja šlachi spazmujucca i zvužajucca, z-za čaho ŭ lohkija pastupaje mienš pavietra. Astmatykam stanovicca ciažka zrabić udych i asabliva vydych. Prystupy supravadžajucca kašlem, chrypami, uzmacnieńniem dychavicy. Arhanizm z usich sił sprabuje supraćdziejničać im, i hetaja baraćba istotna asłablaje jaho.
Pavodle acenak SAAZ, ad astmy pakutujuć 235 młn čałaviek.
Prystupy astmy mohuć spravakavać alerhieny i infiekcyi dychalnych šlachoŭ. U hetym vypadku imunnaj sistemie davodzicca zmahacca nie tolki z astmaj, ale i ź inšymi zachvorvańniami. Časam jana nie ŭ siłach spravicca sa svajoj zadačaj, i ŭ samych niespryjalnych vypadkach heta moža pryvieści da niezvarotnych nastupstvaŭ.
Jašče adno zachvorvańnie dychalnaj sistemy — heta chraničnaja abstruktyŭnaja chvaroba lohkich (CHACHŁ). Ličycca, što adnoj z asnoŭnych pryčyn raźvićcia CHACHŁ źjaŭlajecca tytuniovy dym, pry hetym u hrupu ryzyki ŭvachodziać jak aktyŭnyja, tak i pasiŭnyja kurcy. Imunnaja sistema ludziej z CHACHŁ, jakoj davodzicca zmahacca jašče i ź inšymi zachvorvańniami, adčuvaje padvojnuju nahruzku. Lohkija pacyjentaŭ z CHACHŁ surjozna paškodžanyja, i ŭ virusaŭ značna mienš pieraškod dla praniknieńnia.
Cukrovy dyjabiet
Dyjabiet uźnikaje, kali padstraŭnikavaja załoza nie vypracoŭvaje dastatkova insulinu abo kali arhanizm nie moža efiektyŭna vykarystoŭvać vypracavany insulin. Heta pryvodzić da chraničnaha padvyšanaha ŭtrymańnia cukru ŭ kryvi — hipierhlikiemii.
Pavyšany ŭzrovień cukru ŭ kryvi asłablaje supraciŭlalnaść arhanizma. Infiekcyjnyja zachvorvańni, asabliva tyja, jakija supravadžajucca pavyšeńniem tempieratury, mohuć rezka pahoršyć stan dyjabietykaŭ — navat tych, čyja chvaroba dobra kantralujecca z dapamohaj lekaŭ.
Chvaroba moža ŭrazić sasudy i adbivacca na stanie ŭnutranych orhanaŭ, stvarajučy dadatkovyja nahruzki na ich. I tady imunnaj sistemie stanovicca značna ciažej abaraniać arhanizm ad čužarodnaha i škodnaha ŭmiašańnia.
Sardečna-sasudzistyja zachvorvańni
Ad sardečna-sasudzistych zachvorvańniaŭ (SSZ) štohod pamiraje bolš ludziej, čym ad jakoj-niebudź inšaj chvaroby. Pavodle SAAZ, u 2016 hodzie jany stali pryčynaj śmierci amal 18 młn čałaviek, heta tracina ŭsich śmierciaŭ u śviecie. U 85 pracentach śmierć nastupiła ad sardečnaha prystupu (infarktu) abo insultu. Da SSZ adnosiacca išemičnaja chvaroba serca, pry jakoj kryvianosnyja sasudy nie ŭ stanie zabiaśpiečvać kryvioj sardečnuju ciahlicu, i chvaroba sasudaŭ, jakija zabiaśpiečvajuć kryvioju hałaŭny mozh.
Luboje infiekcyjnaje zachvorvańnie dla ludziej z padobnymi prablemami moža skončycca śmiarotnym zychodam. Heta ž adnosicca da tych, chto pakutuje ad parušeńnia pracy sardečnych kłapanaŭ: virusnyja infiekcyi mohuć destabilizavać pracu ŭsiaho arhanizma.
Hipiertaničnaja chvaroba
Hipiertanija ličycca adnoj z asnoŭnych pryčyn śmiarotnaści na płaniecie. Jana taksama pavyšaje ryzyku raźvićcia zachvorvańniaŭ sardečna-sasudzistaj sistemy, hałaŭnoha mozhu i inšych chvarob.
Vysoki arteryjalny cisk viadzie da paškodžańniaŭ arteryjalnych sasudaŭ i ŭpłyvaje na pracu serca, jakoje vymušana znachodzicca ŭ stanie pierahruzki. Heta moža vyklikać raźvićcio ciažkich sardečna-sasudzistych zachvorvańniaŭ i, jak vynik, asłabić supraciŭlalnaść arhanizma virusam i inšym infiekcyjam.
Ankałahičnyja zachvorvańni
Adnym z najbolš pašyranych mietadaŭ lačeńnia ankałohii źjaŭlajecca chimijaterapija. Pry hetym vykarystoŭvajucca cytastatyki — supraćpuchlinnyja preparaty, jakija parušajuć pracesy rostu, raźvićcia i dzialeńnia złajakasnych kletak. Ale cytastatyki atakujuć nie tolki rakavyja kletki — ad ich pakutujuć i zdarovyja tkanki, heta nanosić straty imunnaj sistemie, i arhanizm stanovicca bolš usprymalnym da patahiennych mikraarhanizmaŭ.
Ludzi, jakija prachodziać sieansy chimijaterapii abo apramieńvańnia, pavinny być nadzvyčaj aściarožnyja. Navat adnosna biaskryŭdnaja prastuda moža stać dla ich vielmi niebiaśpiečnaj.
Aŭtaimunnyja zachvorvańni
Aŭtaimunnych zachvorvańniaŭ mnostva: siarod ich jość redkija i bolš pašyranyja, takija jak reŭmatoidny artryt, psaryjaz, raśsiejany skleroz ci chvaroba Krona (chraničnaje zapaleńnie kišečnika).
Pacyjentam, jakija pakutujuć ad aŭtaimunnych zachvorvańniaŭ, lekary prapisvajuć imunadepresanty, jakija asłablajuć dziejnaść imunnaj sistemy. Prymajuć ich i ludzi ź VIČ. Achoŭnyja miechanizmy sasłablenaj imunnaj sistemy dajuć zboj, i arhanizm stanovicca lohkaj achviaraj infiekcyj. Tamu tym, chto vymušany prymać imunasupresiŭnyja preparataŭ, treba być nadzvyčaj aściarožnymi.
Nu i, narešcie, nie varta zabyvać pra toje, što niekatoryja ŭzbudžalniki infiekcyjnych zachvorvańniaŭ niebiaśpiečnyja i dla ludziej bieź jakich-niebudź chraničnych zachvorvańniaŭ. Tamu ŭsim biez vyklučeńnia varta prajaŭlać aściarožnaść i nie hrebavać praviłami hihijeny.
