«45 tysiač skryniaŭ z pracham». Rasśledavańni pakazvajuć, što kolkaść pamierłych ad karanavirusa ŭ Kitai była zanižana ŭ šmat razoŭ
U Kitai mnohija sumniajucca ŭ danych aficyjnaj statystyki pa śmiarotnaści ad COVID-19. U sacsietkach, niahledziačy na cenzuru, raspaŭsiudžvajucca fatahrafii biaskoncych čerhaŭ pierad pachavalnymi damami va Uchani. Pra heta piša RFI.
Padčas epidemii pamierłych nieadkładna kremiravali, biez pachavalnych cyrymonijaŭ i biez ukazańnia pryčyny śmierci. Svajakam zahinułych prychodzicca čakać paviedamleńnia ad uładaŭ, kab zabrać urny z pracham. Urny pačali vydavać 23 sakavika. Ich chočuć vydać da 5 krasavika, da tradycyjnaha kitajskaha śviata paminańnia pamierłych Cinminu.
Caixin - a reputable Chinese website - is estimating the death toll in Wuhan, based on number of urns ⚱️ ordered by mortuaries, at 40,000. Nearly 20x official figures https://t.co/UBaEtZkTMy
Pa aficyjnych danych, u «epicentry» epidemii, va Uchani, ad nastupstvaŭ karanavirusa pamierli 2535 čałaviek. Kitajskaje ekanamičnaje vydańnie Caixin, jakoje taksama zajmajecca žurnalisckimi rasśledavańniami, usumniłasia ŭ aficyjnaj statystycy. Pavodle jaho danych, tolki ŭ adzin ź siami pachavalnych damoŭ hruzaviki dastavili piać tysiač skryniaŭ u minułuju sieradu i čaćvier. Vydańnie apublikavała fota, na jakich vidać, što skryni składzirujuć u budynku.
Caixin abnarodavała i fatahrafii vielizarnych čerhaŭ pierad uchańskimi pachavalnymi damami. Niekatoryja vidavočcy raspaviadajuć, što im davodziłasia čakać pa niekalki hadzin, a palicyja praviarała, kab nichto nie rabiŭ fota. Fatahrafii i videa čerhaŭ padviarhajucca cenzury ŭ sacsietkach, piša vydańnie Asia News.
Pa padliku hetaha partała, z 23 sakavika pa 4 krasavika (da śviata paminańnia pamierłych) tolki va Uchani vydaduć 45 z pałovaj tysiač skryniaŭ z pracham. «Vierahodna, nie ŭsie śmierci źviazanyja z karanavirusam, ale amal dakładna možna śćviardžać, što aficyjnyja ličby naŭmysna zanižanyja», — robić vysnovu Asia News.
Vydańnie Newsweek u kancy minułaha tydnia acaniła kolkaść pamierłych ad karanavirusa va Uchani ŭ dziasiatki tysiač čałaviek. Za ŭvieś 2019 hod va Uchani było kremiravana krychu bolš za 56 tysiač čałaviek. Miascovyja žychary paraŭnali kolkaść vydadzienych skryniaŭ sa zvyčajnymi pakazčykami pa śmiarotnaści. Jany pryjšli da vysnovy, što ad karanavirusa mahli pamierci 26 tysiač čałaviek.
Pasoł Kitaja ŭ Francyi ŭ intervju BFM TV abvierh manipulacyi sa statystykaj. Pavodle jaho słoŭ, havorka idzie pra «narmalnuju śmiarotnaść», nie źviazanuju z karanavirusam. Jon nahadaŭ, što urny z pracham pierastali vydavać z 23 studzienia.
Kitajskija ŭłady sprabavali schavać vybuch novaha karanavirusa ŭ pačatku epidemii. Lekara, jaki pieršym zajaviŭ pra źjaŭleńnie novaj infiekcyi, padvierhli pieraśledam. Jon sam zaraziŭsia i pamior ad COVID-19. Jaho śmierć vyklikała burnuju reakcyju ŭ Kitai. Karystalniki sacsietak pačali pisać pra nieabchodnaść svabody słova.
