Śmierć ad karanavirusa: zasłužany artyst Biełarusi Viktar Daškievič
U Viciebsku pamior zasłužany artyst Biełarusi, akcior teatra imia Jakuba Kołasa Viktar Daškievič. U jaho byŭ dyjahnastavany Covid-19, z 19 sakavika ŭ jaho było zapaleńnie lohkich.
Hetuju horkuju navinu «Našaj Nivie» paviedamiła žonka artysta.
U jaje taksama zapaleńnie lohkich — ale jana izalavanaja doma, dačka prynosić joj pradukty i pakidaje pad dźviaryma.
Što adbyvajecca ŭ Viciebsku? Infarmacyja ad uładaŭ skupaja, ludziej tryvožać šmatlikija pnieŭmanii
U muža i žonki Daškievičaŭ ź Viciebska adnačasova dyjahnastavali pnieŭmaniju. Ich adpravili ŭ tubdyspanser, «ale tam było pierapoŭniena. Tamu my adprasilisia dadomu, daktary dali nam antybijotyki i adpuścili», — raskazała «Našaj Nivie» spadarynia Daškievič.
Adnak chvaroba nie adstupała, tempieratura rasła, i paru znoŭ špitalizavali — užo ŭ inšuju ŭstanovu, taksama pieraabstalavanuju pad lačeńnia lohačnych zachvorvańniaŭ.
«Doma ŭ muža padniałasia tempieratura. Nas nakiravali ŭ skurviendyspanser, jaki ciapier abstalavali pad pulmanałohiju. Pakłali ŭ roznyja pałaty. Tam uziali analizy na karanavirus, ale skazali, što analiz admoŭny», — praciahvaje spadarynia Daškievič.
24 sakavika 75-hadovamu Viktaru Daškieviču, zasłužanamu artystu Biełarusi, stała horš, i jaho pieraviali ŭ jašče adnu ŭstanovu, jakaja, treba razumieć, ciapier taksama vyznačanaja pad lačeńnie lohačnikaŭ, — u čyhunačnuju balnicu.
Jak viadoma, Covid-19 vyklikaje ŭskładnieńni ŭ vyhladzie spačatku suchoha kašlu, a paśla — pnieŭmanij, častka jakich praciakaje ŭ ciažkaj formie.
Viktar Daškievič doŭhi čas znachodziŭsia ŭ reanimacyi, na štučnaj vientylacyi lohkich. Situacyju ŭskładniała toje, što ŭ jaho była chraničnaja abstruktyŭnaja chvaroba lohkich. Jak viadoma, karanavirus najbolš niebiaśpiečny dla ludziej z chraničnymi chvarobami.
Niajasna, čamu praz doŭhi čas paśla vyjaŭleńnia pnieŭmanii ŭ artysta Daškieviča (i jahonaj žonki), užo kali jany znachodzilisia ŭ balnicy, test na karanavirus byŭ nibyta ŭ abaich admoŭny, a paśla staŭ stanoŭčy — tolki ŭ muža, paśla taho jak jahony stan pahoršaŭ.
Niezrazumieła taksama, čamu niemaładuju žančynu ź pnieŭmanijaj užo praź piać dzion paśla špitalizacyi vypisali dadomu — prytym što ŭ hety ž dzień u jaje muža paćvierdzili karanavirus. Zvyčajna kurs lačeńnia pnieŭmanii daŭžejšy. Da taho ž, kali karanavirus u muža, a pnieŭmanija adnačasova ŭźnikła ŭ jaho žonki, to łahična było b, kab u jaje ŭziali paŭtorny analiz i trymali pad nazirańniem.
«U mianie paŭtorny analiz nie brali, skazali izalavacca i być doma 14 dzion, — kaža spadarynia Daškievič. — Dačka mnie nosić pradukty, pakidaje ich u padjeździe».
Takija racyjanalnyja miery pieraściarohi siamja prymaje z ulikam pahrozy zaražeńnia.
Viciebski teatr imia Jakuba Kołasa admianiŭ śpiektakli. Pa słovach spadaryni Daškievič, siem artystaŭ teatra znachodziacca ŭ balnicy. U piaci ź ich pnieŭmanija.
Usiaho pa stanie na 30 sakavika ŭłady Biełarusi zajavili pra 152 vyjaŭlenyja vypadki karanavirusa. U adroźnieńnie ad inšych krain u Biełarusi nie publikujecca aficyjnaj infarmacyi pra hieahrafičnuju łakalizacyju vyjaŭlenych vypadkaŭ Covid-19, što daje padstavu dla roznych čutak. Minzdaroŭja tłumačyć taki padychod niežadańniem pravakavać paniku.
Viadoma pra vypadki karanavirusa ŭ Minsku — na stalicu, pavodle źviestak «Našaj Nivy», prypadaje prykładna pałova ahulnaj kolkaści infikavanych u krainie.
Akramia taho, tryvožnyja viestki prychodziać ź Viciebska.
Pra adzinkavyja vypadki ci nievialikija kłastary zaražeńnia paviedamlałasia z Hrodna, Homiela, Lelčyckaha, Kapylskaha, Iŭjeŭskaha, Lepielskaha rajonaŭ.
U Viciebsku zaćvierdžanyja miery prafiłaktyki — nie strohija
«Pryjechaŭ syn-dalnabojščyk, paśla Valu zabrali ŭ balnicu». Što adbyvajecca ŭ Doktaravičach na Kapylščynie?
Vypadak karanavirusa vyjaŭleny ŭ Lelčycach
