«Pryjechaŭ syn-dalnabojščyk, paśla Valu zabrali ŭ balnicu». Što adbyvajecca ŭ Doktaravičach na Kapylščynie?
Ale ŭłady admaŭlajuć, što na terytoryi Kapylskaha rajona zafiksavanyja vypadki karanavirusa.
Miedyki pracujuć u Vuhłach Kapylskaha rajona. Fota facebook.com
Karystalniki sacyjalnych sietak źviarnuli ŭvahu na naviny z Kapylskaha rajona. 29 sakavika miedyčnyja rabotniki ŭ achoŭnym adzieńni abychodzili chaty žycharoŭ viosak Doktaravičy, Novyja Doktaravičy i Vuhły. U ludziej brali analizy, a taksama rabili testy. Viadoma, što ŭ śviecie robicca, — heta karanavirus.
«Pryjšli dzieści a siomaj viečara, da kahości i a vośmaj prychodzili. Zrabili analizy, skazali nie vychodzić na vulicy,
— raskazvaje adna z žycharak Doktaravičaŭ. — Škołu zakryli, choć jana i tak na kanikułach, dziciačy sadok taksama nibyta zakryli. Tolki mahazin pracuje. Ale dzie tut siadzieć doma: i pa vadu treba schadzić, i ŭ dvary papracavać. Virus hety ž u pavietry nie lataje?»
Žychary Doktaravičaŭ kažuć, što padazreńnie na karanavirus u miascovaj žycharki Valanciny T. «Nibyta syn da jaje pryjechaŭ, jaki dalnabojščykam pracuje. Potym žančynu zabrali ŭ balnicu ź pnieŭmanijaj. Zdajecca, jašče nie vypisali», — skazała inšaja žycharka vioski.
«Naša Niva» dazvaniłasia da svajakoŭ spadaryni Valanciny, jany rašuča abvierhli čutki pra karanavirus, ale pry hetym admovilisia prakamientavać, što ž na samaj spravie adbyłosia. «Nie-nie, usio nie tak», — paśla hetaha kinuli słuchaŭku.
Valancina T. pracuje techničkaj u miascovaj škole, tamu kantakt ź joj mieli faktyčna ŭsie nastaŭniki Doktarackaj škoły. Viaskoŭcy raskazali «Našaj Nivie», što ŭ balnicy ź pnieŭmanijaj lažyć nastaŭnica anhlijskaj movy Natalla A.
«Jana piensijanierka, raniej žyła ŭ Minsku, potym pierajechała siudy. Kažuć, što ŭ reanimacyi, u jaje cukar vysoki. Heta siastra Žory, u jaho taksama nibyta pnieŭmanija», — raskazali ŭ vioscy.
Žychary Doktaravičaŭ vielmi zaniepakojenyja niečakanymi vizitami miedykaŭ. U pryvatnych razmovach jany kažuć, što ŭ balnicy ŭ Kapyli i Minsku ŭžo zabrali bolš za dziasiatak viaskoŭcaŭ.
Inšyja ŭvohule raskazvajuć, što ŭjezd i vyjezd z Doktaravičaŭ zakryty, ale heta nie adpaviadaje praŭdzie.
Namieśnik staršyni Kapylskaha rajvykankama pa sacyjalnych pytańniach Alaksandr Dubina paviedamiŭ «Našaj Nivie», što na terytoryi rajona pravodziacca prafiłaktyčnyja pracy ŭ suviazi ź situacyjaj z karanavirusam u inšych krainach. «Nijakaha karancinu niama. Na terytoryi Kapylskaha rajona nivodnaha vypadku zaražeńnia karanavirusam nie zafiksavana», — skazaŭ Alaksandr Dubina.
