Tramp: Pik śmiarotnaści ad karanavirusa ŭ ZŠA nastupić praz dva tydni
Dziejańni ŭładaŭ ZŠA možna budzie ličyć paśpiachovymi, kali achviarami zachvorvańnia, vyklikanaha karanavirusam, u krainie stanuć mienš za 200 tys. čałaviek. Taki punkt hledžańnia amierykanski lidar Donald Tramp ahučyŭ u niadzielu na pres-kanfierencyi ŭ Biełym domie, piša tass.ru.
«Padumajcie pra hetu ličbu: 2,2 młn čałaviek mahli b zahinuć, kali b my ničoha nie rabili», — skazaŭ jon, adznačyŭšy taksama, što, na dumku niekatorych śpiecyjalistaŭ, pakazčyk moh być jašče vyšejšym.
«Kali my zmožam źnizić hety pakazčyk da, jak my kazali, 200 tys. čałaviek, to, choć heta i žachlivaja ličba, <…> heta budzie aznačać, što my ŭsie razam zrabili vielmi dobruju pracu», — pierakanany Tramp.
Raniej dyrektar Nacyjanalnaha instytuta alerhičnych i infiekcyjnych zachvorvańniaŭ ZŠA Entani Faŭčy vykazaŭ mierkavańnie, što ŭ krainie achviarami karanavirusa mohuć stać ad 100 tys. da 200 tys. čałaviek. Pry hetym, pavodle jaho słoŭ, zaraziacca miljony ludziej.
Tramp paviedamiŭ, što pik śmiarotnaści ad zachvorvańnia, vyklikanaha karanavirusam, nadydzie ŭ Złučanych Štatach praz dva tydni.
«Pavodle papiarednich prahnozaŭ, pik śmiarotnaści nastupić praz dva tydni, — adznačyŭ jon. — Horš za ŭsio budzie abviaścić pieramohu [nad virusam] pierš, čym jana sapraŭdy budzie zdabytaja». «U suviazi z hetym nieabchodna, kab na praciahu nastupnych dvuch tydniaŭ, na praciahu hetaha pieryjadu, usie pilna trymalisia rekamiendacyj [daktaroŭ]», — padkreśliŭ Tramp.
Prezident ZŠA zajaviŭ, što Złučanyja Štaty praciahvajuć da 30 krasavika dziejańnie sanitarnych abmiežavańniaŭ u miežach baraćby z pašyreńniem karanavirusa.
U pačatku minułaha tydnia Bieły dom pašyryŭ śpis rekamiendacyj, skiravanych na baraćbu z pašyreńniem karanavirusa. Žycharam ZŠA paraili pa mahčymaści pracavać z domu, admianić zapłanavanyja pajezdki, paźbiahać pachodaŭ u bary i restarany i inšyja miescy zboru ludziej. Ich dziejańnie było raźličana da 30 sakavika.
U ZŠA zafiksavanyja bolš za 142 tys. vypadkaŭ zaražeńnia karanavirusam, pamierli zvyš 2,4 tys. čałaviek.