Viktar Marcinovič: Bieražyciesia, bo epidemii nie budzie
Fota Nastaśsi Chrałovič
Viktar Marcinovič razvažaje na budzma.by ab tym, čamu ŭ našaj krainie nie prymajecca nijakich rašučych zachadaŭ dla baraćby z karanavirusam.
Kali ŭsio heta tolki pačynałasia, schilnyja da paranoi analityki vykazvali zdahadku, što toje, što adbyvajecca z karanavirusam ŭ Biełarusi, usio ž maje svajo łahičnaje tłumačeńnie. Što takim čynam nas płaŭniochańka padvodziać da situacyi, kali nadzvyčajnaje stanovišča, admiena vybaraŭ ci praviadzieńnie vybaraŭ va ŭmovach stoadsotkavaha hałasavańnia na damu budzie adzinaj opcyjaj praz abvieščany tatalny łokdaun.
Dyk voś, piesimisty pamylilisia.
Razhortvajecca zusim inšy scenar.
Pavodle katoraha epidemii nie budzie.
Mienavita pra heta śviedčać apošnija vykazvańni adkaznych asobaŭ.
Kali b jany dapuskali mahčymaść uviadzieńnia paŭnavartasnaha karancinu, nie byli b nastolki ŭpartymi voś zaraz, na tle taho, što robicca ŭžo i ŭ Maskvie.
Ale ŭsio, miaža pryjadnańnia da ŭsiaho astatniaha śvietu projdziena.
Čempijanat Biełarusi pa futbole, jaki tranślavali i za miažu ŭ toj čas, kali ssoŭvajucca terminy finała jeŭrakubkaŭ, a «Jeŭra-2020» pieraniesieny na hod, kali ŭžo zrazumieła, što ŭ Italii tryhieram byŭ matč Lihi Čempijonaŭ pamiž «Atłantaj» i «Valensijaj» — heta pazicyja.
Nu nie vierać ludzi ŭ karanavirus.
I, kali jany nie vierać, dyk jak možna pryznavać, što virus jość?
Tamu jaho nie budzie. Navat kali chvorych na pnieŭmaniju zrobicca vielmi šmat. Heta ž usio pnieŭmanija, čort jaje biary. Chto skazaŭ karanavirus? Niama ŭ nas takoha. Mienš za sotniu vypadkaŭ, a vy pahladzicia, kolki vyzdaravieła!
Paśla taho, što ŭžo skazana naviersie, my majem usie šansy być samaj paśpiachovaj u zmahańni z karanavirusam krainaj ŭ śviecie. Z pašytaj na «Słaviancy» tkaniavaj maskaj pa rub siemdziasiat piać u jakaści simvała.
Z nulavoj śmiarotnaściu.
Bo razumiejecie, heta ž taja samaja situacyja, što i z vybarami.
Ličby mohuć być lubymi.
Daktary lohka mohuć być pastaŭleny ŭ tyja ž umovy, u katorych sistematyčna apynajucca nastaŭniki padčas elektaralnych kampanij. I ci nie ŭsio roŭna čałavieku, ad čaho jon nie moža dychać? Ci pryncypova rodnym, što budzie napisana ŭ paśviedčańniach? I, kali ŭsio ž pryncypova, dzie hetaja pryncypovaść kančajecca? I nakolki mocna treba padcisnuć, kab jaje nie zastałosia naohuł?
Kali na stale reputacyja krainy i viernaść abranaha šlacha, pahadziciesia, musić nam usim zrabicca nie da kazurak, niabačnych navat u mocny mikraskop.
Što vy kažacie? Mižnarodnyja arhanizacyi? Dyk jany tut pradstaŭleny ludźmi. Jakim taksama chočacca być na svabodzie. I potym, dzie jana, taja statystyka? Chto joj vałodaje? Chto vyrašaje, što kazać, a što — nie?
Karanavirus — jak radyjacyja ŭ 1986-m. Jaho ž nie bačna. Pa vulicach nie biehaje, nie rochkaje i nie mykaje. Ci jość jon, ci jaho niama — pytańnie viery. U nas vyrašyli nie vieryć.
Aŭtarytaryzm macniejšy za chvarobu.
Tak, darečy, dumali ŭ Kitai, dzie taksama mocnaja i kvitniejučaja sistema. Jakaja taksama spačatku sprabavała nie zaŭvažać.
Tam ułada navat jašče macniejšaja za našuju.
Čamu heta ŭ Kitai virus usio ž vypnuŭsia?
Nie zadumvalisia?
A?
Tavaryščy ŭ pinžakach?
Nie daviadziecca potym u krainy i ŭsich susiedziaŭ prabačeńnia prasić?
Nie?
Vy dumajecie, vy kruciejšyja za kitajcaŭ?
Nu to ładna, paradujemsia!
Hladzicie, da karanavirusa sistemie prapanavana stavicca jak raniej da apazicyi. Jaho niama ni na TB, ni ŭ hazietach, jak raniej tam nie było Statkieviča ci Sieviarynca. Pra jaho hetaksama malujuć niejkija tam karykaturki śpiecyjalna adšukanyja maładziony. Karanavirus — heta aniekdot, by KCHP-BNF. Padychod vierny i za šmat hadoŭ adpracavany.
Da tych, chto vyklikaŭ chutkuju praz zaminy ŭ dychańni, možna adrazu nakiroŭvać milicyju — prabivać usie kantakty ciaham dvuch tydniaŭ. Niekalki repartažaŭ pra toje ŭ ananimnych telehram-kanałach, i da daktaroŭ u nas pačnuć źviartacca, kali ŭžo całkam śsiniejuć.
Znoŭku ž — heta vy zaraz u Fejsbuku źviahajecie, što, maŭlaŭ, susieda «chutkaja» zabrała. A što kali da ŭsich napisałych vysyłać adrazu śpiecnaz u chimkamplekcie? Izalavać na dva tydni — dy adrazu nie ŭ špitali, a ŭ adzinočny pakoj SIZA, bo tam kantaktaŭ dakładna mieniej? Tut takaja pieramoha nad virusam budzie, što Kitaj zachłyniecca ślazami.
Epidemii nie budzie.
Vy pra jaje nie pačujecie.
Dzieci praciahnuć chadzić u škołu, studentam nie admieniać zaniatki, ludzi praciahnuć ciahacca na pracu na hramadskim transparcie.
Jakuju prablemu ja ŭ hetym baču?
U susiedniaj Rasii, ź jakoj sinchranizavana myśleńnie čynavienstva, učora kančatkova abranaja kateharyčna inšaja taktyka.
Tam pačali ałarmavać.
Pucin abviaściŭ tydzień vychodnych z zachavańniem zarobkaŭ. Pačynajecca vidavočny raśsinchron i tutejšym spatrebicca vielmi šmat charaktaru, kab davieści svaju nie vieru ŭ karanavirus da łahičnaha finału, z elehantnymi ličbami. Ale, paŭtarusia, nie budziem hetaha vyklučać — i nie takoje bačyli.
To, kali łaska, bieražycie siabie i svaich rodnych. Abmiažujcie vychady z domu biez patreby.
Pakłapaciciesia pra starych. Toje, što «epidemii nie budzie» — nahoda być abiarežlivymi na indyvidualnym uzroŭni.
