«Hazprom» rekordna skinuŭ canu na haz, kab zachavać jeŭrapiejski rynak. Upieršyniu Biełaruś kuplaje paliva pa canie, našmat vyšejšaj za spotavuju
Ceny na syravinu na hałoŭnym ekspartnym rynku «Hazproma» padajuć paśla ciopłaj zimy, na fonie prytoku zvadkavanaha pryrodnaha hazu (ZPH), u tym liku z ZŠA, i bojazi padzieńnia popytu na syravinu ŭ 2020 hodzie z-za karanavirusa, piša vedomosti.ru.
Tak, Jeŭropa zaviaršyła zimu 2019—2020 hadoŭ sa schoviščami, zapoŭnienymi na 55,5 pracenta. Heta samy vysoki ŭzrovień za ŭsiu historyju nazirańniaŭ. U asobnyja hady taki ŭzrovień zapoŭnienaści byŭ pierad pačatkam zimovaha siezonu.
Cana 1 tysiačy kubamietraŭ hazu z pastaŭkaj na miesiac napierad na niderłandskim chabie Title Transfer Facility bolš za tydzień trymajecca ŭ rajonie 90 dalaraŭ, a 25 sakavika jana apuskałasia da 86 dalaraŭ. Viadoma, što biudžet «Hazproma» viarstaŭsia zychodziačy z 200 dalaraŭ za 1 tysiaču kubamietraŭ.
Z-za padzieńnia spotavych cen čakałasia, što kampanija skarocić prodažy hazu praz svaju ŭłasnuju jeŭrapiejskuju elektronnuju handlovuju placoŭku. Adnak «Hazprom» naraściŭ ich. Z pačatku hoda praź placoŭku kampanija pradała bolš za 8,6 miljarda kubamietraŭ hazu, u tym liku amal 2,4 miljarda kubamietraŭ z pačatku sakavika. Dla paraŭnańnia, za ŭvieś 2019 hod kampanija pradała tam 14,1 miljarda kubamietraŭ.
Siaredniaja cana prodažaŭ upała da minimumu ŭ historyi płatformy — 113 dalaraŭ za 1 tysiaču kubamietraŭ. Hod tamu haz kaštavaŭ vyšej za 200 dalaraŭ.
Na dumku analitykaŭ, «Hazprom» aścierahajecca, što pieryjad nizkich cen na haz zaciahniecca i sprabuje maksimizavać prodažy i harantavać sabie abjomy zbytu. Pra zapusk novych mahutnaściaŭ va ŭmovach nizkich cenaŭ havorka nie idzie.
Biełaruś u hetym hodzie, jak paviedamlałasia, płacić za haz kantraktnuju canu 127 dalaraŭ. Upieršyniu jana našmat pieraŭzychodzić navat canu dla Zachodniaj Jeŭropy, u jakuju jašče ŭklučany i niatanny košt tranzitu.
