Kiraŭnik SAAZ: Samaizalacyja i karancin nie dapamohuć kančatkova pieramahčy karanavirus
Kiraŭnik Suśvietnaj arhanizacyi achovy zdaroŭja Tedras Hiebreisus na bryfinhu dla žurnalistaŭ u Ženievie zajaviŭ, što sama pa sabie samaizalacyja hramadzian i abmiežavańnie na ruch nie dapamohuć kančatkova likvidavać pandemiju karanavirusa, piša RBK.
Pavodle jaho słoŭ, padobnyja miery dazvalajuć vyjhrać čas u baraćbie z raspaŭsiudžvańniem chvaroby, adnak dla vyratavańnia žyćciaŭ hetaha niedastatkova. «Vy stvaryli akno mahčymaściaŭ. Ale pytańnie ŭ tym, jak vy jaho vykarystoŭvajecie», — zajaviŭ kiraŭnik SAAZ.
Pavodle jaho słoŭ, isnuje šeść sposabaŭ damahčysia praryvu ŭ baraćbie z raspaŭsiudžvańniem chvaroby.
U pieršuju čarhu nieabchodna palepšyć sistemu achovy zdaroŭja i padrychtavać miedycynski piersanał, hatovy pracavać z chvorymi. Taksama nieabchodna vyjavić usich infikavanych i pavialičyć kolkaść testaŭ na karanavirus.
Taksama Hiebreisus zajaviŭ ab nieabchodnaści rychtavać dadatkovyja balnicy dla pryjomu pacyjentaŭ, adsočvać usie kantakty tych, chto zachvareŭ, i pierakinuć usie siły mienavita na baraćbu z karanavirusam.
«Hetyja miery dapamohuć nie tolki spynić raspaŭsiud virusa, ale i nie dapuścić adnaŭleńnie epidemii paśla źniaćcia ŭsich abmiežavańniaŭ», — zajaviŭ kiraŭnik SAAZ. «Kali vy budziecie iznoŭ adčyniać škoły i pradpryjemstvy, to tolki dla taho, kab zakryć ich potym», — skazaŭ jon.
«Znachodzić, izalavać, testavać, lačyć, adsočvać — voś sposab paźbiehnuć dalejšych abmiežavańniaŭ», — skazaŭ Hiebreisus.
Pa danych univiersiteta Džona Chopkinsa, usiaho ŭ śviecie karanavirusam zarazilisia bolš za 460 tys. čałaviek. 20857 pamierli, 113,6 tys. vyzdaravieli. Bolš za ŭsio zahinułych u Italii, Ispanii, Kitai, Iranie i Francyi.