Śpiektakli Kupałaŭskaha teatra z 27 sakavika pa 2 krasavika možna pahladzieć anłajn
Niekatoryja śpiektakli z repiertuaru Nacyjanalnaha akademičnaha teatra imia Janki Kupały z 27 sakavika pa 2 krasavika hledačy zmohuć ubačyć anłajn.
«Tydzień Kupałaŭskaha online» arhanizavany ŭpieršyniu. Jak adznačyŭ hienieralny dyrektar Kupałaŭskaha teatra Pavieł Łatuška, meta prajekta — stvaryć dadatkovyja mahčymaści, kab aznajomicca z šedeŭram teatralnaha mastactva suśvietnaha ŭzroŭniu nie tolki žycharam Biełarusi, ale i pradstaŭnikam biełaruskaj dyjaspary za miažoj, suajčyńnikam, jakija pa roznych pryčynach znachodziacca za miažoj, i ŭsim, chto cikavicca biełaruskaj kulturaj.
Start prajekta zapłanavany na 27 sakavika — Mižnarodny dzień teatra. U hety viečar hledačy zmohuć ubačyć vizitku Kupałaŭskaha teatra — śpiektakl «Paŭlinka». Pramy efir budzie dastupny ź luboj pryłady ŭ sietcy luboha apieratara Biełarusi i inšych krain śvietu biez aŭtaryzacyi. 29 sakavika budzie tranśliravacca zapis śpiektakla «Škoła padatkapłacielščykaŭ» — jarkaja i iraničnaja francuzskaja kamiedyja pavodle tvora Łui Vierneja i Žorža Biera.
31 sakavika hledačam stanie dastupny prahlad zapisu śpiektakla «Vieltmajstar-akardeon» — papularnaha śpiektakla-kancerta pavodle tvoraŭ Marka Miermana ŭ pastanoŭcy Mikałaja Pinihina z udziełam arkiestra Kupałaŭskaha teatra. Zapis śpiektakla z repiertuaru Kamiernaj sceny «Uradžaj» hledačy ŭbačać 2 krasavika. Admietnaja pastanoŭka Dźmitryja Ciško stvorana pavodle tvoraŭ adnaho z samych viadomych sučasnych biełaruskich dramaturhaŭ Paŭła Pražko.
Spasyłki na online-tranślacyju i prahlad zapisaŭ śpiektaklaŭ buduć dastupny na sajcie teatra i ŭ sacyjalnych sietkach.
