Biełaruskija miedyki raspaviali, ci varta chadzić u kafe, cyrulni i sałony pryhažości
Biełaruskija miedyki dali šerah rekamiendacyj pa abaronie ad karanavirusa ŭładalnikam restaranaŭ, rabotnikam masažnych sałonaŭ i sałonaŭ pryhažości, piša Interfax.by.
«My rekamiendujem adsunuć stoliki na 1-1,5 mietra, kab było mienš kantaktaŭ», — skazała na pres-bryfinhu ŭ Minsku ŭ paniadziełak namieśnik načalnika adździeła hihijeny, epidemijałohii i prafiłaktyki Ministerstva achovy zdaroŭja Ina Karaban.
Miž tym, jana adznačyła, što situacyja z karanavirusam u Biełarusi kantralujecca, i ŭ Ministerstvie achovy zdaroŭja nie bačać padstaŭ dla rekamiendacyj začyniać punkty hramadskaha charčavańnia.
«Začyniać ich niama sensu. A voś pierachodzić na dastaŭku praduktaŭ i straŭ — vielmi niadrennaja miera», — adznačyła Karaban.
Anałahičnaje mierkavańnie ŭ Ministerstvie achovy zdaroŭja vykazali i adnosna sałonaŭ pryhažości, cyrulniaŭ, masažnych sałonaŭ. Ich taksama nie płanujuć abmiažoŭvać u pracy, adnak rajać udakładniać u klijentaŭ, dzie jany byli papiarednija 14 dzion.
«Ja b rekamiendavała tym, chto pravodzić manipulacyi roznyja, pytacca ŭ ludziej, jakija da ich źviartajucca, ci byli jany za miežami Biełarusi apošnija 14 dzion. I, mahčyma, navat admaŭlać im u akazańni pasłuh», — prapanavała namieśnik ministra achovy zdaroŭja Biełarusi Alena Bohdan.
Jana patłumačyła, što takim čynam rabotniki i siabie abaroniać, i nahadajuć tym, chto pryjechaŭ z-za miažy, što tyja pavinny znachodzicca ŭ samaizalacyi, kab nie ŭjaŭlać niebiaśpieku dla navakolnych.