Roźnica — u paŭtara raza. U Biełarusi paraŭnali ceny na chajpovyja tavary
Muka ŭ roznych supiermarkietach adroźnivajecca ŭ canie na 13% i vyšej, alej — na 25%, tualetnaja papiera — u paŭtara razy. Kamanda servisu pa paraŭnańni cen u kramach InfoPrice supastaviła ceny na tavary pavyšanaha popytu ŭ roznych sietkach.
Startap InfoPrice, jaki adsočvaje ceny na dziasiatki tysiač pazicyj, adabraŭ tavary ažyjatažnaha popytu. Manitorynham achapili 6 handlovych sietak: «Jeŭraopt», «Susiedzi», «Karona», «Vitalur», «Hipa» i Green. Vyśvietliłasia, što na ŭsie chajpovyja tavary ceny ŭ zaležnaści ad sietki adroźnivajucca ŭ siarednim na 10-20%.
Tak, pšaničnaja muka ŭ kiłahramovaj fasoŭcy vahajecca ŭ canie na 13-14%, a samaja tannaja kaštuje mienš rubla. U pačkach pa dva kiło roźnica bolš adčuvalnaja — na 28% i vyšej. Padobnaja situacyja sa słaniečnikavym alejem, jaki moža «skakać» na 25% u roznych kramach.
Samym chajpovym tavaram apynułasia tualetnaja papiera. Ceny na jaje adroźnivajucca ŭ roznych sietkach u paŭtara raza. Błok z 4 miakkich rułonaŭ možna znajści za 1,79 rubla, a ŭpakoŭka žorstkaj papiery kaštuje 39 kapiejek.
Nižej za ŭsio ryzyka pierapłacić za hrečku — u siarednim kala 6%. Krupy rasijskaj vytvorčaści ciapier kaštujuć ad 1,59 rubla za 800 hramaŭ. Praktyčna identyčnyja ceny vystaŭlajuć rytejlery i na biełaruskija kansiervy sa śvininy i jałavičyny.
Ceny na biełaruskija makarony ŭ siarednim adroźnivajucca na 10%. Mabyć, pa ich rytejlery prytrymlivajucca minimalnych nacenak. Zatoje niekatoryja sietki adyhryvajucca na italjanskaj paście: pry niaŭdałym vybary kramy možna pierapłacić na 65% ad rynkavaj cany.
Samyja ŭražlivyja nacenki dziejničajuć na harbatu i kavu. Na papularnyja pazicyi košty mohuć adroźnivacca ŭdvaja ŭ zaležnaści ad rytejlera. Na bancy rastvaralnaj kavy možna zekanomić da 10 rubloŭ, a na ŭpakoŭcy anhlijskaha čaju — kala piaci.
Pavodle daśledavańnia, samy nizki ček na ŭvieś košyk tavaraŭ pavyšanaha popytu pakazaŭ «Jeŭraopt». Adnak na asobnyja pazicyi ceny nižejšyja ŭ inšych sietkach. Pry žadańni možna prycanicca samastojna. U InfoPrice adznačajuć, što za adzin pachod u kramu možna sekanomić 30-40 rubloŭ.
