Minzdaroŭja prosić pažyłych zastavacca doma, usich — trymać dystancyju paŭtara mietra. Chto viarnuŭsia z-za miažy — samaizalujciesia na 14 dzion
Biełaruskija miedyki zapuścili fłešmob «Zastańciesia doma dziela nas!».
23 sakavika Ministerstva achovy zdaroŭja vystupiła z novymi rekamiendacyjami ŭ suviazi z COVID-19. Jany ŭ cełym anałahičnyja tym, jakija byli ŭviedzienyja ŭ bolšaści jeŭrapiejskich krain tydzień ci dva raniej. Ale, u adroźnieńnie ad bolšaści krain, u nas jany majuć rekamiendacyjny, a nie abaviazkovy charaktar.
Ministerstva achovy zdaroŭja zaklikaje pažyłych ludziej pa mahčymaści zastavacca doma, zajaviła žurnalistam namieśnica ministra achovy zdaroŭja Alena Bohdan. «My zastajomsia na pracy, kab dapamahčy vam. Vy zastajaciesia doma, kab dapamahčy nam», — skazała jana.
Miedyki zaklikali da samaizalacyi taksama ludziej z chraničnymi zachvorvańniami.
Čytajcie taksama: Tłumačym, čamu nastupnyja tydni ŭ śviecie praciahniecca rost śmierciaŭ ad karanavirusa
Ministerstva achovy zdaroŭja taksama rekamienduje takuju mieru, jak dystancyjavańnie ad inšych ludziej.
— Niama zabarony na naviedvańnie vulicy i parkaŭ, ale razam z tym havorym pra toje, što treba vykonvać miery dystancyjavańnia — dystancyju mietr-paŭtara, kab nie było raspaŭsiudžvańnia virusa. Heta dapamoža paźbiehnuć zaražeńnia navakolnych, — raskazała na bryfinhu namieśnica načalnika adździeła hihijeny, epidemijałohii i prafiłaktyki Ministerstva achovy zdaroŭja Ina Karaban.
Ina Karaban taksama rekamiendavała zastavacca doma ŭsim ludziam z prykmietami VRVI. Kali takoj mahčymaści niama, takomu čałavieku treba nasić masku.
Usich, chto budzie viartacca ŭ krainu z-za miažy, buduć prasić padpisać pamiatku pra samaizalacyju na 14 dzion.
Pamiatki buduć vydavacca na miažy. Ludzi buduć stavić podpis pad napaminam pra toje, što nie buduć chadzić na pracu, naviedvać svajakoŭ i siabroŭ i abmiažujuć kantakty ŭ siabie ŭ siamji.
Abviestki z prośbaj zachoŭvać dystancyju ŭ 1,5—2 mietry pamiž naviednikami źjavilisia na dźviarach adździaleńniaŭ «Biełpošty»,
takija miery ŭviedzienyja «dla niedapuščeńnia raspaŭsiudžvańnia virusnych infiekcyj». Taksama prosiać znachodzicca pa adnym la apieracyjnaha akna.
Biez uviadzieńnia aficyjnaha karancinu admienienyja mnohija kulturnyja i zabaŭlalnyja mierapryjemstvy ŭ stalicy i rehijonach.
Biełaruskija daktary taksama dałučylisia da suśvietnaha fłešmobu lekaraŭ #StayAtHome.
Škoły dali mahčymaść vučniam nie naviedvać zaniatki — pa žadańni baćkoŭ.
VNU častkova pierajšli na dystancyjnuju formu navučańnia.
Anałahičnyja miery pryniali raniej susiednija ź Biełaruśsiu i inšyja jeŭrapiejskija krainy.
Nieŭviadzieńnie karancinnych mier uładami Biełarusi na minułym tydni vyklikała burnuju krytyku na formuach i ŭ sacyjalnych sietkach. Biełaruskija ŭłady śćviardžali, što epidemijałahičnaja situacyja ŭ krainie pakul nie daje padstaŭ dla rašučych dziejańniaŭ, jakija mohuć pahoršyć ekanamičnuju situacyju. «Biełarusy nie znachodziacca ŭ toj situacyi, kab prymać drakonaŭskija miery. Ale i supakojvacca nie treba», — kazaŭ Alaksandr Łukašenka try dni tamu, 20 sakavika.
Tym časam śviet spaŭzaje ŭ ekanamičnuju depresiju z-za pandemii. Heta moža asabliva mocna ŭdaryć pa krainach ź nizkimi finansavymi reziervami. Kurs biełaruskaha rubla adnosna dalara za apošnija tydni apuściŭsia da 2,63 i praciahvaje źnižeńnie.
