Bloomberg: Ceny na naftu ŭpaduć da $20, a to i nižej
Naftavyja trejdary, jakija pieražyvajuć abvał rynku na fonie raspadu ździełki APIEK+ i epidemii novaha karanavirusa, paviedamili, što situacyja moža pahoršycca i cana nafty ŭpadzie da $20 za baral, a to i nižej, piša Bloomberg.
Taki prahnoz dali 18 z 20 apytanych ahienctvam śpiecyjalistaŭ. Nafta marki WTI, na ich dumku, budzie tarhavacca jašče na $3-5 tańniej. Pry hetym takaja nizkaja cana moža trymacca jak niekalki tydniaŭ, tak i da kanca hoda, adznačyli surazmoŭcy ahienctva.
Pa słovach dyrektara indyjskaj naftahazavaj kampanii Bharat Petroleum Corp Ramamufry Ramačandrana, adznaku $20 nafta «lohka prabje» užo da siaredziny krasavika. I heta niahledziačy na toje, što nafta ŭ hetym hodzie ŭžo patańnieła na 60%, apuściŭšysia da minimumu 2003 hoda, adznačaje ahienctva.
Šerah trejdaraŭ pry hetym pakazali na toje, što cana na naftu ŭpała nastolki mocna, što častka hulcoŭ pačała kuplać paliva, kab sfarmavać zapas u nadziei na budučy rost, piša Bloomberg. Inšyja trejdary miarkujuć, što ceny praciahnuć źnižacca da ŭzroŭniu, pry jakim vytvorcy pierastanuć atrymlivać prybytak, što vymusić ich spynić zdabyču i spynić pastaŭki. Minimalnaj adznakaj častka trejdaraŭ ličyć košt vytvorčaści amierykanskaj słancavaj nafty.
