Što rabić z katami i sabakami, kali haspadaroŭ zabiaruć na karancin?
Usich, chto kantaktavaŭ z chvorymi na karanavirus, miedyki zvoziać na 14-dzionny karancin u špitali. Chatni karancin nie praduhledžany, a chutkaja moža pryjechać pa čałavieka ŭ luby čas. Jak u takoj situacyi być haspadaram katoŭ i sabak?
U Ministerstvie achovy zdaroŭja paradaŭ na hety kont nie dajuć i vyklučeńniaŭ nie robiać. «Žyviołami my nie zajmajemsia», — koratka patłumačyli ŭ pres-słužbie.
Fota Nadziei Bužan.
Stvaralnica centra pa abaronie žyvioł «Animaleks» Nastaśsia Žaŭryd kaža, što vyjście tolki adno — zahadzia pradumać płan dziejańnia.
«Pažadana, kab było niekalki varyjantaŭ pieratrymki. Zvyčajna prosiać svajakoŭ ci siabroŭ. Lepš pakidać hadavanca doma, va ŭmovach, da jakich jon pryvyk. Ale kali z katom heta realna, chtości moža pryjści i pakarmić, to z sabakam składaniej. Maje sens chacia b z susiedziami damovicca, kab jany klučy pieradali tamu, chto pryjedzie dahladać.
Tym, chto budzie zabirać sabaku na pieratrymku, treba viedać, što sabaka moža vieści siabie nie vielmi dobra. Praz stres jon moža vyć, drapacca», — papiaredžvaje Nastaśsia Žaŭryd.
Kali daviadziecca zabirać hadavanca na taksi, abaviazkova treba papiaredžvać pra hety niuans pry zamovie. Z maleńkimi sabakami zvyčajna niama prablem — ich možna pasadzić na kaleni ci vieźci ŭ pieranoscy. Vialikich nie ŭsie hatovy puścić u sałon — usio zaležyć ad kiroŭcy i słužby taksi.
Varyjantam moža być i zoahaścinica. Ale znoŭ ža, treba papiarednie damovicca z kimści ź blizkich, kab hadavanca tudy zavieźli.
Nastaśsia Žaŭryd kaža, što ŭ suviazi z karancinam užo byli vypadki, kali koški prasiadzieli dzień, zamknionymi ŭ prybiralni. Paśla ich zabrali da siabie siabry tych, chto akazaŭsia ŭ špitali.
Nie zabyvajciesia, što karanavirus nie pieradajecca praz chatnich hadavancaŭ.
