«Pryjechaŭ ź Italii, paklikali ŭ pustuju palikliniku pierazdać analiz na karanavirus — a tam čarha ludziej!»
«U druhoj pałovie lutaha palacieŭ ź dziećmi da baćkoŭ u Italiju. 4 sakavika viarnuŭsia ŭ Biełaruś z Ryma, zdali ŭ aeraporcie test na karanavirus, — napisaŭ «Našaj Nivie» čytač ź Minska Michaś. — Paśla dva tydni siadzieŭ ź dziećmi doma, žonka prynosiła nam ježu pad dźviery kvatery. Niekalki dzion tamu nam patelefanavali z palikliniki i skazali, što treba pierazdać analiz. Skazali pryjści ź dziećmi 18 sakavika ŭ 4-ju palikliniku z 8:00 da 8:30. My zapiarečyli, što tam ža, napeŭna, budzie šmat ludziej. Na što nam adkazali, što nie — jakraz u hety čas nikoha nie budzie. Ja akurat čytaŭ, što ŭ 4-j paliklinicy uvodziać paŭkarancinny režym, i padumaŭ, što, vidać, heta akurat čas dla takich naviedvalnikaŭ, jak my.
Ja byŭ vielmi ździŭleny, pabačyŭšy čarhu ź niekalkich čałaviek… Dobra, zaniaŭ čarhu i sieŭ ź dziećmi na łaŭku. Kali padyšła maja čarha, to vielmi doŭha stali šukać kartku dziaciej, skazali, što jaje niama. Ja nabraŭ pa telefonie miedsiastru, što zaprasiła nas u palikliniku (ciapier ja razumieju, što treba było adrazu heta zrabić). Akazvajecca, jana adkłała kartku i paviedamiła ŭ rehistratury, ale jany, na žal, pra heta ci nie viedali, ci zabylisia. U samoj łabaratoryi byli ŭ šoku, što mianie paklikali mienavita ŭ hety čas, i nie viedali, što rabić. U vyniku mianie paprasili čakać dalej. Uvieś hety čas pa kalidory prachodzili ludzi, ja staraŭsia maksimalna ad usich addalicca, dy, na žal, heta było niemahčyma. U vyniku a 9-j u paliklinicy było ŭžo amal pusta, i tolki tady nas paklikali na test.
Ja paviedamiŭ piersanału, što napišu skarhu. Mianie pačali supakojvać, što ja ž užo zdavaŭ test i dva tydni nie mieŭ simptomaŭ, tamu ryzyka minimalnaja. Potym doktarka, što brała analiz, patelefanavała miedsiastry. Nibyta nasvaryłasia, što mnie pryznačyli taki čas, a potym užo bolš łaskava paprasiła: «Bolš tak nie rabi». Ja ŭdakładniŭ, ci zdavali da mianie ŭ paliklinicy test. Mnie skazali, što tak. I pakul «usio było cicha».
Dla mianie situacyja vielmi dziŭnaja. U aeraporcie ŭsia schiema adpracavanaja da drobiaziaŭ. A tut u absalutna ŭ štatnym režymie miašajuć ludziej z nakiravańniem na test i inšych naviedvalnikaŭ. Zastajecca tolki spadziavacca, (u tym liku i za inšych naviedvalnikaŭ), što test budzie admoŭny.
