«Mianie paprasili heta zrabić». Pinskija nastaŭnicy raskazvajuć, jak vypadkova apynulisia na prajmieryz apazicyi
Prajmieryz apazicyi — sami saboju navacyja. Ale toje, što zdaryłasia na prajmieryz na Bieraściejščynie — absalutnaja niečakanaść. Lidar pieradvybarnaj honki Pavieł Sieviaryniec źniaŭ svaju kandydaturu paśla hałasavańnia ŭ Pinsku, Drahičynie i Stolinie.
Jon miarkuje, što ŭłada padklučyła adminresurs — na prajmieryz padciahnuli piedahohaŭ, kab tyja svaimi hałasami trochi padkarektavali vyniki. U vyniku bolšaść hałasoŭ nabraŭ lidar ruchu «Za svabodu» Juraś Hubarevič.
Błohier Alaksandr Kabanaŭ raskazaŭ «Našaj Nivie», što nibyta maje pierapisku, u jakoj čynoŭniki zaklikajuć padnačalenych i piedahohaŭ paŭdzielničać u prajmieryz apazicyi.
«Nam skinuli pierapisku čynoŭnikaŭ, ale my jaje nie vykładvajem, bo tak paprasili ludzi — mohuć vyličyć taho, chto źliŭ. Praŭda, u pierapiscy ludziam nie kažuć, za kaho im hałasavać», — kaža Kabanaŭ.
Fota Media-polesye.by
Jon zapeŭnivaje, što načalnik adździeła ideałohii Pinskaha harvykankama Valancina Kułak razasłała padnačalenym taki ci to zaklik, ci to zahad.
«Ale jana samastojna takija pytańni vyrašać nie moža. Ja dumaju, heta kuryrujecca KDB, — razvažaje Kabanaŭ. — U vyniku kali raniej Sieviaryniec pieramahaŭ ź vialikim adryvam, to ciapier raptam pajšli pieramohi ŭ Hubareviča. Ja nie dumaju, što Hubarevič sam heta zrabiŭ, chutčej, ułady jaho vybrali jak bolš łajalnaha i spakojnaha. Nu i plus, jon prosta byŭ na druhim miescy. Išła b Kavalkova druhoj — za jaje b hałasavali».
Ale navat kali hetyja piedahohi pryjšli pa zahadzie, jany ž usio roŭna zastajucca hramadzianami Biełarusi, jakija majuć prava prysutničać i hałasavać na tych prajmieryz — apazicyja zahadzia zaćvierdziła takuju adkrytuju praceduru. To-bok apazicyja prosta prahladzieła, što ich demakratyčnaja inicyjatyva moža być voś tak prosta zmanipulavanaja?
«Taki varyjant padziej abmiarkoŭvaŭsia, ale ž dumali, što adminresurs uklučać za Kanapackuju. I heta adna z pryčyn, čamu jaje źniali z prajmieryz», — tłumačyć Kabanaŭ.
Juraś Hubarevič taksama prakamientavaŭ hetuju situacyju:
«Nijakuju pierapisku čynoŭnikaŭ ja nie bačyŭ i ŭvohule pieršy raz čuju pra heta. Ale
ja bačyŭ publikacyju Kabanava, dzie jon sfatahrafavaŭ niekalki čałaviek i zajaviŭ, što heta miascovyja nastaŭniki. Dyk što tady — u nas jość zabarona dla nastaŭnikaŭ prychodzić na prajmieryz? — kaža Hubarevič. — Tak razumieć pasył Kabanava?
Ale ž cikaŭnaść da prajmieryz z boku čynoŭnikaŭ isnuje ad pačatku. I pačałosia ŭsio jašče ź Viciebskaj vobłaści. Tam prychodziŭ namieśnik staršyni Miorskaha rajvykankama, jon navat uziaŭ udzieł u hałasavańni. Ja nabraŭ u Miorach nul hałasoŭ, Sieviaryniec nabraŭ bolšaść. Na toj momant situacyja nie vyklikała nijakich abureńniaŭ u jaho. Toje ž možna skazać pa Lepieli, pa Biarozie, dzie Sieviaryniec nabiraŭ bolšaść, a na sustrečach taksama byli pradstaŭniki adździełaŭ ideałohii. Kali pieramahaješ, to značyć, što miascovaja ŭłada padtrymlivaje apazicyju, a kali nie pieramahaješ, to miascovaja ŭłada robić kavarnyja kroki? Taki trochi infantylny padychod.
Kali kazać pra Pinsk, to ja nie viedaju, za kaho hałasavali tyja nastaŭniki. Kali jany hałasavali za mianie, to dziela zachavańnia adzinstva ŭdzielnikaŭ prajmieryz ja hatovy hetyja piać ci kolki tam hałasoŭ addać Paŭłu Sieviaryncu: chaj jon viartajecca i praciahvaje».
«Naša Niva» adšukała niekatorych piedahohaŭ ź pinskaj škoły №1, jakija naviedvali prajmieryz.
Palina Jakušenka, piedahoh-arhanizatar škoły №1, zapeŭniła, što načalstva nibyta navat nie viedała pra jaje cikavaść da prajmieryz apazicyjnych palitykaŭ.
Palina Jakušenka, fota vk.com
«Mianie paprasili heta zrabić, jak i mnohich inšych. Ja chadziła jak słuchač, ni za kaho nie hałasavała. U biulecień ja nie pastaviła ničoha tamu, što siarod usich kandydataŭ nichto nie prajaviŭ siabie ni jak lidar, ni jak čałaviek, jaki niešta moža źmianić. Mietady i pryncypy kandydataŭ mnie nie blizkija. Ja nie źjaŭlajusia častkaj apazicyi i nikoli nie budu, maju namier hałasavać za ciapierašniaha prezidenta», — kaža Palina.
Navošta ž tady jana chadziła na tyja prajmieryz?
«Pierakanacca ŭ svajoj praŭdzie. My, moładź, pavinny viedać ludziej, jakija mahli b niešta źmianić. Na žal, siarod tych, kaho ja pačuła, takich nie było. Adzinaje, što ja čuła — vychodźcie na vulicy strajkavać», — adkazała piedahoh.
«Mianie paprasili schadzić znajomyja, nie načalstva. Majo načalstva nie viedała, što ja chadziła», — zapeŭniła Jakušenka. Praŭda, pa niezrazumiełaj pryčynie paźniej vydaliła svaje adkazy (ale skrynšoty pierapiski zastalisia ŭ Redakcyi).
Nastaŭnica matematyki sa škoły №1 Pinska Maryja Sielužyckaja taksama pierakonvaje, što zavitała na prajmieryz vypadkova.
Maryja Sielužyckaja, fota vk.com
«A čaho hetaja tema raptam usich pačała cikavić? My štości kiepskaje zrabili? Było žadańnie — schadziła, nie było b — nie chadziła b. — dzivicca Sielužyckaja. —
Ja sama zajšła tudy vypadkova. Hulała pa Lenina, ubačyła pobač niejkich ludziej, kaleh, padyšła pahladzieć, što tam takoje. Paśla pabyła trochi, i syšła. Ni ŭ jakim hałasavańni ja ŭvohule nie ŭdzielničała. Ja pahladzieła, što heta, zrazumieła, što heta nie majo, i syšła».
