U Viciebsku masava atrucilisia vučni himnazii. Na śniadanak byli zapiakanka i buter ź miasam
Bolš za 90 dziaciej viciebskaj himnazii №4 nie pryjšli siońnia na zaniatki praź niedamahańnie, raskazali «Našaj Nivie» baćki.
Siarod vučniaŭ, jakija atrucilisia, šmat piacikłaśnikaŭ. U inšych kłasach, małodšych i starejšych, taksama jość dzieci, jakim siońnia ŭnačy stała drenna i jakija zastalisia doma.
Dzieci raskazvajuć, što ŭčora na śniadanak im davali tvarožnuju zapiakanku sa śmiatanaj, buterbrod z varana-vendžanym miasam i mandaryny.
Pa infarmacyi «Našaj Nivy», u škołu siońnia nie pryjšło 95 čałaviek. Niekatoryja ź ich trapili ŭ Viciebskuju dziciačuju abłasnuju kliničnuju balnicu.
«Maje dzieci taksama atrucilisia. Małodšy ŭ balnicy, starejšy doma — jaho vanituje, i jość tempieratura, — raskazvaje žančyna. — U škole jany jeli tolki abaviazkovy śniadanak. Małodšy z hadziny siomaj viečara adčuŭ niedamahańnie. Kruciła žyvot, potym padniałasia tempieratura, i pačało vanitavać. Tempieratura nie źbivałasia. A pieršaj hadzinie nočy vyklikali «chutkuju». Starejšamu hadzinie a 9 viečara stała drenna. A rankam padniałasia tempieratura».
U škole ciapier pracuje sanstancyja.
«U mianie ciapier pravierki, ničoha nie mahu vam skazać, my jašče raźbirajemsia. Heta moža navat być nie atručeńnie ŭ škole. Usio budzie zaŭtra viadoma, zaŭtra buduć vyniki analizaŭ», — prakamientavała dyrektarka himnazii №4 Viciebska Iryna Sirvucis.
Jana śćviardžaje, što ŭ balnicu trapiła niašmat vučniaŭ, ustanova pracuje ŭ štatnym režymie.
