Čamu anieksija była paśpiachovaj? Historyja Michaiła i Lva. «Čarkasy»: novy ŭkrainski film pra padziei 2014 hoda
Čamu adny zdradžvali prysiazie, a druhija — nie? Dziedaŭščyna, ałkahalizm i pachody ŭ stryp-kłuby. Film, zasnavany na realnych padziejach, raskazvaje pra padziei viasny 2014 hoda ŭ Krymie.
Marski tralščyk «Čarkasy», razam ź inšymi karablami ŭkrainskaha Čarnamorskaha fłota na šlachu ŭ Adesu byŭ zabłakavany rasijskimi vojskami ŭ krymskaj buchcie Danuzłaŭ. Ukrainskija karabli zdajucca adzin za adnym, i tolki ekipaž «Čarkas» supraciŭlajecca i praciahvaje baraćbu.
Pieśni, knihi, śpiektakli pra trahičnyja miesiacy 2014-ha pačali źjaŭlacca va Ukrainie amal adrazu. Kinaindustryja patrabuje značna bolš resursaŭ i času dla vytvorčaści. Dy i zdymka filmaŭ na asnovie realnych padziej patrabuje peŭnaj refleksii i pieraasensavańnia.
Što patrebnaja adlehłaść ad padziei projdzienaja, śviedčyć film «Čarkasy», jaki vyjšaŭ u miascovy prakat — dobraje patryjatyčnaje kino, u jakim niama pustoha i falšyvaha pafasu.
«Čarkasy», jaki supraciŭlaŭsia try tydni, staŭ adzinym ukrainskim karablom, što nie spuściŭ dziaržaŭnaha ściaha.
Paśla niekalkich adčajnych sprobaŭ prarvacca z buchty i atak rasijan na karabiel, na «Čarkasach» byli mocna paškodžany miechanizmy kiravańnia, tamu čarhovaha šturmu, jaki adbyŭsia ŭ noč z 25 na 26 sakavika 2014 hoda, ukrainski tralščyk nie vytrymaŭ, i całkam pierajšoŭ pad kantrol Rasii.
Film raskazvaje hetuju historyju ad imia Michaiła i Lva, dvuch viaskovych chłopcaŭ, jakija pa roznych pryčynach apynajucca na hetym karabli.
Heta historyja nie tolki pra hieraizm asobnych ukrainskich aficeraŭ, heta taksama historyja pra zdradu ŭkrainskich admirałaŭ i prostych matrosaŭ (bolšaść ź jakich pierajšło na bok Rasii), pra razvaleny ŭkrainski Čarnamorski fłot, jaki katastrafična dehradavaŭ za hady niezaležnaści, pra mizernyja zarobki ŭkrainskich kapitanaŭ, pra žachlivuju karupcyju i paralizavanuju sistemu kiravańnia, kali ŭkrainskija aficery-patryjoty ŭ Krymie čakali zahadaŭ ad kamandavańnia, a zahady prosta nie prychodzili…
Kamandzir karabla «Čarkasy» Juryj Fiedaš mieŭ mahčymaść vyvieści karabiel u adkrytaje mora, pakul jašče rasijanie nie zabłakavali prachodu, jon čakaŭ tolki zahadu kamandavańnia. Ale kali zahad pryjšoŭ, było ŭžo pozna — rasijanie śpiecyjalna zatapili ŭ prachodzie jašče adzin karabiel, i ŭkrainski tralščyk akazaŭsia całkam zabłakavany ŭ buchcie.
Film pakazvaje nie tolki hieraizm ekipaža «Čarkas», nie tolki apisvaje praces anieksii Krymu, jon jašče i vydatna pakazvaje, jak i čamu hetaja anieksija adbyłasia.
U dramie było pakazana žabrackaje žyćcio ŭkrainskich aficeraŭ, šmat chto ź jakich zdradziŭ prysiazie i pierajšoŭ na bok rasijan.
U filmie možna pabačyć, jak da anieksii rasijskija i ŭkrainskija marskija aficery razam jeli ŭ adnych stałovych, jak razam zajmalisia supolnymi spravami, a časta byli i prosta svajakami. I vydatna pakazana, jakim byŭ šok dla ŭkrainskich vajskoŭcaŭ z pačatkam anieksii — jany prosta fizična nie mahli stralać u tych, z kim jašče ŭčora razam viačerali, chadzili na futboł i razam adznačali siamiejnyja śviaty.
Aŭtary filma nijak nie prycharošvajuć i nie hieraizujuć ukrainski fłot tych časoŭ, naadvarot, jany pakazvajuć usiu jaho žachlivuju sutnaść: ź dziedaŭščynaj, ałkahalizmam, pachodami ŭ stryp-kłuby, maciukami kapitanaŭ, kašmarnym charčavańniem na karablach.
Biez pakazalnaha hieraizmu i natchniajučych replik u nikudy, z-za čaho sapraŭdy vierycca, što ŭsio było mienavita tak. Ale ŭsie hetyja prablemy nijak nie abiasceńvajuć hieraizm chłopcaŭ z «Čarkas», a tolki ŭzmacniajuć jaho, bo jany zdoleli zachavać viernaść prysiazie siarod hetaha biazdonnaha ŭkrainskaha biazładździa.
Film nie źjaŭlajecca dakumientalnaj rekanstrukcyjaj padziej, ale jon na dziva realistyčny.
Vialikaja rola ŭ filmie adviedziena muzycy: maraki śpiavajuć pieśniu Lapisa Trubiackoha «Voiny śvieta».
Padčas apošniaha šturmu karabla hučyć nie mienš simvaličnaja pieśnia «Čorna hora» z radkami «Ja nikoli i nikomu nie viddam ridnoho domu».
Pryčym scena z vykanańniem pieśni «Voiny śvieta» źjaŭlajecca absalutna realnym epizodam tych padziej.
A zaviaršajecca film scenaj u rodnym siale hałoŭnaha hieroja filma, Mišy.
Jon viartajecca dadomu, da baćkoŭ, i kala ich chaty jaho sustrakaje ŭsia vioska jak sapraŭdnaha hieroja. Lijecca rakoj harełka, stoł łomicca ad jady, svajaki i znajomyja absalutna ščyryja ŭ svajoj radaści bačyć Mišu. Ale čamuści nichto ź ich nie choča havaryć pra vajnu, i Miša nie moža hetaha staŭleńnia zrazumieć. Hetaja scena — vydatnaja adsyłka da ciapierašniaha stanu ŭkrainskaha hramadstva, jakoje, z adnaho boku, pavažaje svaju armiju i hierojaŭ, ale, ź inšaha boku, ličyć za lepšaje vajnu ihnaravać.
