28 sakavika — vandroŭka «Archipiełah Sapiehaŭ»
Novaja Myš — Kosava — Ružany — Słonim.
Fond «Kraina zamkaŭ» zaprašaje na ekskursiju pa ziemlach, jakija kaliści naležali adnamu z samych upłyvovych rodaŭ Vialikaha Kniastva Litoŭskaha — Sapieham.
U vioscy Novaja Myš, niedaloka ad Baranavič, znachodzicca niesamavity na pieršy pohlad parafijalny kaścioł pieršaj pałovy XIX stahodździa, pabudavany na srodki Franciška Sapiehi. Kaścioł nievialiki, viaskovy kłasicyzm, ničoha asablivaha — ale heta tolki na pieršy pohlad. Kali vy traplajecie ŭsiaredzinu, bačycie raźblonyja baročnyja ałtary, ambon, chory, arhan, mižvoli ŭźnikaje pytańnie: adkul tut takoje bahaćcie? Unutry kaścioła Pieramianieńnia Haspodniaha vy zmožacie palubavacca ŭratavanymi interjerami niaśvižskaha kaścioła bieniedyktynak.
Kosava viadomaje pomnikam architektury — ramantyčnym pałacam Pusłoŭskich, zbudavanym u 1838 h., jaki spałučaje ŭ sabie rysy kłasicyzmu i hotyki.
U draŭlanym kosaŭskim kaściole 1626 h. (ciapier na jaho miescy kaścioł Śviatoj Trojcy XIX st.), 12 lutaha 1746 hodzie byŭ achryščany Tadevuš Kaściuška — hieroj Biełarusi, Polščy i ZŠA, kiraŭnik paŭstańnia 1794 h. U Kosavie ŭdzielnikaŭ ekskursii čakaje i znajomstva z najcikaviejšaj ekspazicyjaj u domie-muziei Tadevuša Kaściuški.
Ružany viadomyja ź piśmovych krynic ad siaredziny XVI st. Miastečka słaviłasia vytvorčaściu sukna, dyvanoŭ, špaleraŭ, mastackich pajasoŭ i inšych vyrabaŭ, jakija išli nie tolki na patreby fieadała, ale i na prodaž. Słavilisia Ružany taksama i kirmašami.
Pierabudova razburanaha zamka ŭ pałacavy ansambl źviazanaja ź imiem Jana Samuela Biekiera, prydvornaha architektara Sapiehi. Kompleks byŭ zadumany jak spałučeńnie hałoŭnaha i dvuch dapamožnych karpusoŭ, abjadnanych mahutnaj arkadaj. Ansambl nie zachavaŭsia całkam, adnak manumientalnyja ŭjaznaja brama — tryŭmfalnaja arka, reštki pabudoŭ pakidajuć mocnaje ŭražańnie.
Słonim — horad, padjom jakoha adbyŭsia dziakujučy rodu Sapiehaŭ. Navat u našy dni možna ŭbačyć haradski hierb, na jakim zašyfravana imia i proźvišča vialikaha kanclera Lva Sapiehi. Z byłych časoŭ da nas dajšoŭ unikalny ansambl pravasłaŭnych i katalickich chramaŭ, ratuša, sinahoha, haradskaja zabudova XVIII-XX stst.
Zapisacca ŭ vandroŭku pa sapiehaŭskich uładańniach možna patelefanavaŭšy:
(17) 203-69-70
(17) 226-03-02
(29) 682-58-07
(29) 772-77-58
Bolej infarmacyi — na sajcie www.zamak.by.
Fond «Kraina zamkaŭ». UNP 690382807