Viadomaja biełaruskaja žurnalistka viarnułasia ź Italii i trapiła ŭ infiekcyjnuju balnicu z tryvožnymi simptomami
Minčanka Darja Łamanoŭskaja z «Kamsamolskaj praŭdy» była na poŭnačy Italii jašče da paviedamleńniaŭ pra ŭspyšku karanavirusa tam, piša «Radyjo Svaboda».
«Vyklikała «chutkuju», mianie adrazu zavieźli ŭ infekcyjny špital na Krapotkina, — raskazvaje Darja. — Tut, u 4-m korpusie, znachodziacca chvoryja na karanavirus, u mianie inšy korpus, treci, zdajecca. U susiedniaj pałacie tut tyja, chto kantaktavaŭ z zachvarełym. Chto dakładna, nia viedaju. Mnie pra heta sanitarka raskazała».
Da lekaraŭ Darja źviarnułasia paśla taho, jak źjeździła ŭ Italiju na karotki adpačynak. Spačatku Darja z mužam byli ŭ Balońni, paśla pajechali ŭ Venecyju, viartalisia z Treviza. Pryjechała ŭ Miensk 16 lutaha, tady jašče nie było infarmacyi pra ŭspyšku karanavirusu na poŭnačy Italii. Da 27 lutaha ŭ Darji nie było kłopataŭ sa zdaroŭjem, adnak u pieradapošni dzień zimy raptam zabaleła horła i padniałasia temperatura.
«Horła baleła mocna, vyrašyła pazvanić u palikliniku, — praciahvaje Darja. — Mnie kažuć — prychodźcie ŭ subotu. Ja pryjšła z mužam. Jak tolki tam pačuli, što my byli ŭ Italii i chočam pravierycca na karanavirus, nam adrazu vydali maski, da doktara biez čarhi adviali. Jana nas u mascy sustreła, raspytvała, dzie my byli, što i jak. Pahladzieła horła i skazała, što ŭ nas anhina. Adpuściła dadomu. Skazała, što testu na karanavirus nia treba rabić».
Ale stan zdaroŭja Darji za vychodnyja nie palepšyŭsia, ŭ paniadziełak rankam jana vyrašyła znoŭ schadzić u špital, na hety raz da otarynalarynholaha. Jon pastaviŭ užo inšy dyjahnaz — vostry tanzylafarynhit. I taksama adpuściŭ dadomu. Uviečary 2 sakavika, paśla padvyšeńnia temperatury, sprava dajšła da «chutkaj».
«Pryjechali dźvie maładyja dziaŭčyny, u specyjalnych akularach, u maskach z klapanami, — raskazvaje Darja. — U chałatach byli taksama. Temperaturu pamierali, ahledzieli horła, spytali navat pra numar rejsu, jakim my prylacieli ź Italii. Sazvońvalisia ź niekim i zabrali mianie ŭ infekcyjny špital. Skazali, što akurat chutka 14 dzion, jak ja pryjechała ź Italii, usio supadaje».
U infekcyjnym špitali Darju jašče raz ahledzieli, uziali analizy, raspytali pra maršrut padarožža i nakiravali ŭ pałatu. Tam užo była adna dziaŭčyna.
«Adčyniaju dźviery, a tam dziaŭčyna ŭžo lažyć, — raskazvaje Darja. — Ja kažu im: my ž budziem kantaktavać. A raptam ja zaraznaja albo jana zaraznaja. My ž nieviadomyja adna adnoj. Raptam u niekaha z nas karanavirus. Ja pabačyła pahrozu, paprasiła mianie ŭ asobnuju pałatu źmiaścić. Medsiastra pahadziłasia, ja joj vielmi ŭdziačnaja za heta. Pakul ja adna tut, doktar skazaŭ, što prynamsi ŭ aŭtorak nikoha nie padsielać. Što budzie dalej, nieviadoma».
Darji pakul nie skazali, kali buduć hatovyja vyniki analizaŭ na karanavirus. Zaŭtra ŭ jaje dzień naradžeńnia, sustrakać jaho, chutčej za ŭsio, daviadziecca ŭ infekcyjnym špitali.
«Bajusia, što da mianie niekaha padsielać, — kaža Darja. — Ja ŭžo pytałasia pra płatnuju pałatu, ale tut niama takich. Medyki vielmi starajucca, ja ŭdziačnaja im. Raspytvajuć mianie pra stan, temperaturu praviarajuć. Tut takaja atmasfera svojeasablivaja. Usie ŭ specyjalnych akularach. I medyki, i sanitarka navat. Jana tut prybirała siońnia. Dobraje da mianie staŭleńnie.
Sanitarka paŭžartam skazała, kab ja nie vychodziła na kalidor, a to mahu tam karanavirus padchapić. Z majho akna vidać namioty, jakija MNS pastaviła. Strach jość u mianie. Bajusia niečym zarazicca, ščyra kažučy. Ale i ŭ medyčnaha persanału taksama strach. Naprykład, mnie prynosiać ježu i starajucca chutka syści. Ale ja mahu heta zrazumieć. Temperatura, viarnułasia ź Italii — jość pytańni».
Darja pryznajecca: amal upeŭnienaja, što ź joj usio dobra. Adnak nie mahła pravieryć, ci tak heta nasamreč. Užo ŭ infekcyjnym špitali prasiła adpuścić jaje pad chatni karantyn, adnak medyki admovili. Muž žurnalistki pakul «na svabodzie», u jaho niama takich vostrych symptomaŭ.
«Ja sutyknułasia z svojeasablivym ckavańniem, — raskazvaje Darja. — Navat kalehi na pracy zusim surjozna kazali: Daša, nie padychodź da mianie. Maŭlaŭ, u mianie dzicia, nia treba da mianie nabližacca. Adpraŭlali mianie pravierycca. Niechta dakaraŭ tym, što ja, viarnuŭšysia ź Italii, nie chadziła na pracu ŭ mascy. Ale kali ja viarnułasia, to pra epidemiju ŭ Italii nie było ničoha viadoma. Tolki tut daviedałasia pra ŭsio, nie adrazu, praź niekalki dzion. I symptomaŭ nia mieła. Ja pačała dziejničać tady, kali prajavilisia symptomy. U majho znajomaha, jaki taksama viarnuŭsia ź Italii, na pracy peŭnyja kalehi navat chadzili da načalstva, patrabavali prybrać z ofisu ŭsich, chto byŭ niadaŭna ŭ Italii. Kab jany pracavali z domu. Heta ŭražvaje ŭsio, viadoma. Dyskryminacyja niejkaja».
Ciapier Darja čakaje vynikaŭ analizaŭ. Pje harbatu, piša artykuły ŭ svajo vydańnie, razmaŭlaje z rodnymi.
