Azierbajdžanskaja kampanija moža pastavić u 2020 hodzie miljon ton nafty
Dziaržaŭnaja naftavaja kampanija Azierbajdžana Socar moža pastavić u Biełaruś u 2020 hodzie da 1 młn t nafty. Pra heta paviedamiŭ siońnia žurnalistam staršynia kancerna «Biełnaftachim» Andrej Rybakoŭ pa vynikach sustrečy premjer-ministra Biełarusi Siarhieja Rumasa z prezidentam Socar Raŭnaham Abdułajevym, pieradaje BiełTA.
«Abjomy buduć naroščvacca z hoda ŭ hod. Havorka idzie pra abjomy sioleta — da 1 młn t nafty. Heta budzie vyznačacca kožny miesiac zychodziačy z ekanamičnych, łahistyčnych składnikaŭ i h. d. Ale heta budzie na pastajannaj asnovie», — adznačyŭ Andrej Rybakoŭ.
Jak paviedamlałasia, Socar adpravić pieršy tankier z naftaj dla Biełarusi z tureckaha porta Džejchan 5-6 sakavika. Abjom pastaŭki nafty składzie kala 85 tys. ton. Prykładna 20 sakavika płanujecca adhruzić druhi tankier z hruzinskaha porta Supsa taksama abjomam kala 85 tys. ton.
