Va ŭsich abłasnych centrach krainy źjavicca sieryja art-instalacyj «Mova» FOTY
U Mižnarodny dzień rodnaj movy, 21 lutaha, kampanija A1 pradstaviła novy prajekt, dziakujučy jakomu ŭ ramkach inicyjatyvy «Vielič rodnaj movy» viasnoj 2020 hoda ŭ Minsku i najbujniejšych haradach Biełarusi — Breście, Viciebsku, Hrodnie, Homieli i Mahilovie — źjavicca sieryja niezvyčajnych mastackich instalacyj. Heta buduć nabory interaktyŭnych skulptur, jakija razam utvarajuć słova «MOVA».
Manumientalnyja tekstavyja instalacyi stanuć miescami kamfortnaha adpačynku, bo faktyčna ŭjaŭlajuć ź siabie vuličnuju meblu, vyrablenuju z dreva i mietału. Aŭtar art-abjektaŭ — viadomy biełaruski skulptar Pavieł Vajnicki. Pa jaho zadumie, «MOVA» słužyć miescam kamunikacyi, dzie ludzi mohuć sustrakacca i zručna raźmiaščacca na skulpturnych litarach.
Łakalnyja asablivaści kožnaha z šaści rehijonaŭ buduć pakazanyja praz koler instalacyj — ideja prajekta bazirujecca na kancepcyi nacyjanalnych koleravych upadabańniaŭ, raspracavanaj vydatnym dyzajnieram, mastakom i paetam Michałam Aniempadystavym u knizie «Koler Biełarusi», a taksama na daśledavańniach najbujniejšaha biełaruskaha etnohrafa Michaiła Ramaniuka, jaki rekanstrujavaŭ kolery tradycyjnych narodnych strojaŭ roznych rehijonaŭ Biełarusi.
Pakolki Minsk — hieahrafičny, sacyjalny i kulturny centr krainy, dzie pieramiašanyja asablivaści ŭsich rehijonaŭ, heta budzie adlustravana z dapamohaj usich asnoŭnych koleraŭ, jakija charaktaryzujuć našu krainu, — siniaha, zialonaha, žoŭtaha, čyrvonaha i čornaha. Miesca raźmiaščeńnia instalacyi ŭ stalicy jašče ŭdakładniajecca.
Va ŭsich haradach art-abjekty źjaviacca ŭviesnu.
