«Vykrykvaŭ «Žyvie Biełaruś». U Mahilovie pakarali ŭdzielnika mitynhu suprać intehracyi z Rasijaj
Za ŭdzieł u pratestavych akcyjach suprać pahłyblenaj intehracyi z Rasijaj Leninski rajonny sud Mahilova 20 lutaha pakaraŭ aktyvista Stanisłava Paŭlinkoviča štrafam u pamiery 810 rubloŭ (30 bazavych vieličyniaŭ), piša Radyjo Svaboda.
Sudździa Viktoryja Palakova pryznała mahiloŭca vinavatym u tym, što jon 20 i 21 śniežnia 2019 hodu parušyŭ paradak praviadzieńnia masavaha mierapryjemstva.
U vyraku jana adznačyła, što Paŭlinkovič u hrupie hramadzian udzielničaŭ u niesankcyjanavanym mitynhu i vykrykvaŭ lozunhi «Žyvie Biełaruś!» i «Niezaležnaść».
Viny Stanisłaŭ Paŭlinkovič nie pryznaŭ, ale paćvierdziŭ, što ŭdzielničaŭ u pratestavaj akcyi, bo «razhladaje intehracyju z Rasijaj pahrozaju suverenitetu Biełarusi».
Aktyvist zaklikaŭ sudździu «prajavić hramadzianskuju mužnaść dy prafesijnuju pryncypovaść» i spynić administracyjny praces, pakolki jon parušaje jahonaje kanstytucyjnaje prava na vykazvańnie dumak i svabodu schodaŭ. Sam pieraśled Paŭlinkovič nazvaŭ palityčna matyvavanym.
Na Paŭlinkoviča pratakoł ab administracyjnym pravaparušeńni skłali 18 lutaha, u Leninskim rajonnym adździele milicyi Mahilova. Tudy jaho dastavili z metalurhičnaha zavodu, dzie jon pracuje. Raspačaŭ spravu major rajonnaha adździełu milicyi Karnijenka.
Z materyjałaŭ spravy aktyvist daviedaŭsia, što za akcyi pratestu suprać intehracyi, jaki prachodzili 7 i 8 śniežnia, mienski sud jaho pakaraŭ štrafam u pamiery 637 rubloŭ. Paŭlinkoviču raniej nie paviedamlali pra heta. Jon źbirajecca abskardzić prysudy Mahiloŭskaha i Mienskaha sudoŭ.
