Pamiatajecie «Kryvavy sakavik» i «Nie cenić hierojaŭ maja Biełaruś»? Čym siońnia žyvie lehiendarny repier Kroŭ
Palityčnyja padziei siaredziny 2000-ch ciažka sabie ŭjavić biez repieraŭ z «Čyrvonym pa biełym». U čym byŭ pośpiech prajekta? Hałoŭnaje — jany byli adnymi ź pieršych, chto staŭ čytać pa-biełarusku chip-chop. Aproč taho, u ich byli maksimalna radykalnyja i palityzavanyja teksty. Nu i narešcie, muzykanty zachoŭvali vakoł siabie tajamničaść nie nazyvali imiony, nie pakazvali tvary.
«Siońnia maŭčym, a zaŭtra lohka pradacca. Kum idzie na kuma, a brat idzie na brata. Biełaruskaja Ideja — tema dla śpiekulacyj. Addajem dziaržavu, a chutka stracim nacyju! Za krainu kryŭduju, a ŭ hieroi nie rvuś, Bo nie cenić hierojaŭ maja Biełaruś!», — mabyć, mnohija pomniać hetyja i inšyja treki repiera Kroŭ, jaki byŭ lidaram «Čyrvonym pa Biełym».
U 2007 hodzie ČpB vydaŭ svoj apošni albom «Kryvavy sakavik». U 2010 hodzie vyjšła jašče adna pieśnia ad Kroŭ, na hetym tvorčaść hurta spyniliasia. «Naša Niva» parazmaŭlała ź lidaram «Čyrvonym pa biełym» pra jaho ciapierašniaje žyćcio.
Repier Kroŭ
Žyvie ŭ Varšavie
Navat u artykule ŭ Vikipiedyi nie nazyvajecca sapraŭdnaje imia repiera Kroŭ, a taksama nie paznačanaje jahonaje miesca naradžeńnia. Dyj uvohule mała infarmacyi pra jahonaje asabistaje žyćcio.
«Mianie zavuć Pavieł Karpieš. Ja naradziŭsia i žyŭ u Hrodnie. Maja mama pachodzić z hetaha horada, baćka — z Brestčyny.
U Hrodnie ros, chadziŭ u škołu. Taksama hadavaŭsia na radzimie baćki ŭ Pružanskim rajonie. Možna skazać, što ja vychadziec z Zachodniaj Biełarusi, serca Čornaj Rusi. Hrodna lažyć pobač z Polščaj, i tak atrymałasia, što vialikaja častka majoj siamji pierajechała ŭ hetuju krainu. Navat naprykancy žyćcia ŭ Polšču pierajechali maje dziadula z babulaj. Dziadula troški pa palityčnych abstavinach. Sprava ŭ tym, što jašče da prychodu da ŭłady Łukašenki jon zajmaŭ dastatkova vysokuju pasadu ŭ Hrodnie. Nie chaču nazyvać proźvišča», — raskazvaje Pavieł.
Praz kolki dzion repieru spoŭnicca 37 hadoŭ. Bolšuju častku žyćcia jon pražyŭ u Polščy. «Maje baćki daktary. Kali mnie było piatnaccać hadoŭ, vyrašyli, što treba źjazdžać u Polšču. Jany paličyli, što za miažoj zmohuć dać svaim dzieciam lepšuju budučyniu. Vyjechali spačatku ŭ Biełastok, a paśla ŭ Varšavu».
«Dzieviać kłasaŭ ja skončyŭ u Hrodnie, a potym vučyŭsia ŭ licei ŭ Polščy. Paśla škoły pajšoŭ vučycca na mižnarodnyja finansy, ale nie skončyŭ, kinuŭ. Mnie nie padabajecca sistema adukacyi jak u Biełarusi, hetak i ŭ Polščy. Vyrašyŭ nie hublać čas, a lepš praktykavać», — kaža Kroŭ.
Zajmajecca biznesam
«Niejki čas ja raźvivaŭsia ŭ markietynhu i žurnalistycy. Pracavaŭ na adnym z najbujniejšych polskich telekanałaŭ TVN. Ja tam byŭ pradziusaram. Papracavaŭ na «Biełsacie», dzie vioŭ pieradaču YoLife!. Ale na telekanale nam čamuści nie praciahnuli kantrakt. Viedaju, što potym «Biełsat» zrabiŭ vielmi-vielmi padobnuju prahramu, ale ź inšymi asobami. Heta ŭžo była kiepskaja kopija, moža, tam biudžet byŭ mienšy. Ja liču, što na toj čas my rabili absalutna ŭnikalnuju pieradaču, anałahaŭ jakoj u Polščy nie było», — raskazvaje Pavieł.
Na siońnia jon maje biznes. «U mianie razam z partnioram ź Biełarusi jość polska-biełaruskaja kampanija, fabryka, jakaja handluje piłamateryjałami. U Biełarusi takim čynam dajem pracu tryccaci ludziam», — kaža Pavieł.
Jak pryjšoŭ u rep
«Majo zachapleńnie chip-chopam pačałosia z Decła.
My z Kiryłam adnahodki, paznajomilisia ź im u Maskvie, jon pryjazdžaŭ u Polšu. Byli dastatkova pryjaznyja adnosiny. Razumiejecie, u toj čas nie było takich mahčymaściaŭ, jak ciapier. My mieli tolki tuju muzyku, jakuju pradavali na kasietach u hrodzienskich šapikach. Uvohule ŭ Biełarusi vielmi šmat chto ŭciahnuŭsia ŭ rep-kulturu jakraz praz Decła. Byŭ niepraciahły pieryjad, kali ja zacikaviŭsia pankam, chutčej, kamiercyjnym pankam, jak The Offspring. Ale mnie zaŭsiody byŭ cikavy najpierš chip-chop».
Kali Pavieł vyrašyŭ paekśpierymientavać u muzycy, to, kaniečnie, u repie. «Mnie zdavałasia, što isnavała takoje pustoje miesca na muzyčnaj mapie Biełarusi — heta biełaruskamoŭny, patryjatyčny chip-chop. Ja vyrašyŭ pasprabavać, brat rabiŭ muzyku, ja spačatku karystaŭsia čužymi vieršami, a potym sam pačaŭ pisać. Byŭ forum brat.info, dzie źbiralisia prychilniki kultury chip-chopu, ja tam šmat z kim znajomiŭsia.
Biełaruskuju movu vučyŭ sam. My niejak pačali ŭ svajoj tusoŭcy varšaŭskich biełarusaŭ havaryć pa-biełarusku. Pamyłka na pamyłcy, ale navučylisia z časam.
Praŭda, ciapier mnie ciažka razmaŭlać pa-biełarusku, ja joj amal nie karystajusia, paŭsiul polskaja. Jość tolki niekalki znajomych, ź jakimi pastajanna stasujusia na biełaruskaj».
Byŭ strach, što aryštujuć
«Kali vychodzili maje albomy, to ja žyŭ u Polščy.
Ale heta nie značyć, što ja nie pryjazdžaŭ u Biełaruś, ja tam byvaju i ciapier, i nie tolki ŭ kantekście pracy. U Polščy była trochu inšaja infarmacyjnaja prastora, čym u Biełarusi, bolš niezaležnych krynic.
Ja liču siabie patryjotam Biełarusi, lublu svaju radzimu, hanarusia, što biełarus. Ź mianie časam śmiajucca siabry praz toje, što ja ŭvieś čas havaru pra biełarusaŭ.
Skažam, abmiarkoŭvajem karaloŭ Polščy, i ja zaŭsiody kažu, što voś Jahajła byŭ biełarusam ci ŭ kaho inšaha biełaruskija karani», — kaža Kroŭ.
Ci nie było ŭ repiera strachu praz svaju tvorčaść, kali jon pryjazdžaŭ u Biełaruś? «Bajaŭsia, kaniečnie, aryštu. Pieršy kancert u Minsku nie adbyŭsia tamu, što byŭ strach, što aryštavać mohuć nie tolki mianie, ale i šmat kaho jašče. Kali źbiralisia ludzi, my pabačyli šmat levych łysych chłopcaŭ, na rukach u jakich byli śpiecnazaŭskija palčatki. My zrazumieli, što buduć pravakacyi i, mahčyma, bojka. Heta była nikomu niepatrebnaja ryzyka, tamu kancert nie adbyŭsia.
Kali tabie dvaccać hadoŭ, to ty maksimalist, kali ŭ ciabie ŭžo jość dzieci, to hladziš na heta ŭsio inšymi vačyma. Heta narmalna. Junakam zdajecca, što im niama čaho hublać. Kali maješ siamju, dziaciej, kvateru, pracu, to ŭžo razumieješ, što možaš zhubić».
Čamu Kroŭ?
«Bo biełaruskaja kroŭ ciače ŭ maich vienach, nasamreč niejak chutka ŭźnikła takaja idejka. Plus da ŭsiaho pa-anhlijsku Crow — heta krumkač. Heta zaŭsiody byŭ taki simvał dla mianie».
Tłumačyć Pavieł i čamu abraŭ takuju taktyku tajamničaści vakoł hurta. «Ja zaŭsiody zajmaŭsia rekłamaj, markietynham, tamu vykarystoŭvaŭ tajamničaść u svajoj tvorčaści. Kaniečnie, z adnaho boku, mnie nie chaciełasia śviacicca i padstaŭlać siamju, ale ź inšaha — ja cudoŭna razumieŭ, što takaja zakrytaść pryciahvaje ŭvahu ludziej. Kali prosta rabić muzyku, to heta nie zaŭsiody cikava. Jość šmat muzykaŭ, jakija robiać šykoŭnuju muzyku, ale nie mohuć pryciahnuć da siabie ŭvahu, bo nie majuć niejkaj fiški. Ja razumieŭ, što ŭmieju rabić šum vakoł siabie».
Pohlady nie pamianiaŭ
Jak siońnia repier hladzić na svaje tahačasnyja teksty? Ci nie zdajucca jany jamu pa-dziciačamu naiŭnymi? «Ja amal nikoli nie źmianiaŭ svaich pohladaŭ. Pierad tym jak niešta skazać ci napisać, ja doŭha abdumvaju, ci pravilna ja rablu albo nie. Siońnia ja hladžu na situacyju vielmi padobna, jak i raniej».
«Nie, da Łukašenki ja nie staŭlusia pa-inšamu. Ale, moža, krychu źmianiŭsia rakurs. Viadoma, Łukašenka ŭ mianie nie vyklikaje ni pavahi, ni davieru, a ź inšaha — niama lidara, jakoha b ja moh padtrymać.
Ja nikoli nie hałasavaŭ za Łukašenku, ale adnačasova adčuvaju patavaść situacyi, što nie baču inšych lidaraŭ. Ukrainski kanflikt šmat u čym prymusiŭ nie hladzieć na rečy adnabakova. Paśla hetaha ja nie kažu, što Łukašenka na 100% usio robić niapravilna. Moža, na 90% tak i jość, ale jość jašče 10% pravilnych učynkaŭ. Mahčyma, jon robić heta ŭ svaich intaresach, ale heta supadaje ź intaresami krainy», — kaža Pavieł.
U 2010 Kroŭ pryznaŭsia, što jon libiertaryjaniec, u toj hod jon padtrymaŭ kandydata ŭ prezidenty Jarasłava Ramančuka. «Ja nie demakrat, mnie ad krainy patrebnaja źniešniaja biaśpieka (vojska), unutranaja biaśpieka (palicyja) i minimalnaja administracyja. Ja liču, što ludzi sami pavinny zajmacca svaimi spravami.
Padatki pavinny iści na mocnuju armiju i palicyju, a ŭsio astatniaje ja mahu sam zrabić. Ludzi nie razumiejuć, kali b jany nie płacili častku padatkaŭ, to mahli b sabie dazvalać pryvatnych daktaroŭ, adukacyju i šmat čaho inšaha. Jak ja byŭ piatnaccać hadoŭ tamu libiertaryjancam, tak i zastajusia siońnia».
Čamu ČpB razvaliŭsia?
«Pierastali isnavać praz hrošy. Kali ty student i ciabie ŭtrymlivajuć baćki, možna dazvolić sabie zajmacca tym, što nie prynosić hrošaj. Paźniej tabie treba karmić siamju, a muzyka nie daje zarobku, i treba šukać inšuju pracu. Biez hetaha nijak. U nas prosta nie było času na tvorčaść.
Ludzi pavinny razumieć heta. Kali hetym zajmacca, to treba rabić dobra, a kab rabić dobra, to treba addavać 100% svajho času. Tamu muzyka ŭ Biełarusi ciapier u hłybokim zaniapadzie. I ciapier šmat hurtoŭ pierastajuć isnavać praz tuju ž pryčynu. Kali b my narmalna zarablali, mahli b zdymać kłasnyja klipy, nabyvać jakasnyja instrumientały, naniać dobraha pradziusara. A ŭ nas muzyki zaniatyja tym, što dumajuć, za što chacia b pajeści. Tamu i muzyka ź Biełarusi ŭ asnoŭnym niecikavaja».
Korž i Alona-Alona
«Ja liču, što i Maks Korž, i Aleh ŁSP małajcy. Jany znajšli svoj šlach, robiać dobruju spravu. Ja z Karžom paznajomiŭsia niekali na zdymkach YoLife!. Chłopcy pryjšli paznajomicca, pafatahrafavacca, prajšło stolki času, ciapier by ja z radaściu parazmaŭlaŭ z Karžom, spadziajusia, jašče budzie nahoda. Mnie ad jaho ničoha nie patrebna, prosta cikava było b parazmaŭlać, jak na viečary sustrečy vypusknikoŭ.
Niadaŭna chadziŭ ź dziaŭčynaj na ŭkrainku Alonu-Alonu, jana, kaniečnie, vielmi fajnaja. Jana b nie strelnuła, kab nie rabiła fajnaha repu, a da ŭsiaho jana takaja puchłaja dziaŭčyna, što pryciahvaje da jaje ŭvahu. Heta toje, što ja kazaŭ: dadatkovaja fiška, jakaja dapamahaje ŭ raskrutcy. Kali ty ŭnikalny i adroźnivaješsia ad inšych, to ty vystrelvaješ. Toje ž było i z ČpB, jakija pieršyja stali čytać rep pa-biełarusku. Ja nie kažu pra Alaksandra Pamidorava, jaki tam niešta padryfmoŭvaŭ, ale heta nie była jahonaj kulturaj».
Ci choča znoŭ čytać rep?
«Kaniečnie, pišu teksty. Kali niechta siadzić u chip-chopie, to jon zaŭsiody mientalna budzie tam. U mianie jość teksty na biełaruskaj movie, jakija byli napisanyja raniej, ja ich dapracavaŭ, a taksama ja staŭ pisać na polskaj movie.
U svoj čas ja zarakaŭsia, što nikoli nie budu hetaha rabić. Mnie zdavałasia, što ja nie zmahu hetaha rabić tak, jak polskija repiery, jakija žyvuć u hetaj movie ad naradžeńnia. Ale pasprabavaŭ z padačy viadomaha polskaha repiera Pezet'a, heta takaja ikona polskaha repu, my pierasiaklisia na zdymkach jahonaha klipa. Jon cikavicca i ruskamoŭnym repam, a taksama kaliści słuchaŭ ČpB. Jon i pierakanaŭ mianie sprabavać, pakul mnie cikava. Mnie zdajecca, što atrymlivajecca pisać u svaim styli».
Čempijon Polščy pa amierykanskim futbole
«Ja hulaju ŭ Warsaw Eagles — heta samaja staraja ŭ Polščy kamanda pa amierykanskim futbole, niadaŭna nam spoŭniłasia dvaccać hadoŭ. Try-čatyry apošnija hady hulaju ŭ asnoŭnym składzie. U 2018-2019 byŭ čempijonam Polščy.
Jak zaniesła? Zdymaŭ pra amierykanski futboł sieryju ŭ YoLife!. Ja tam trapiŭ na treniroŭku kamandy, paśla hetaha staŭ zaŭziataram, chadziŭ na hulni.
Potym pryśpieŭ čas, kali ja zrazumieŭ, što treba bracca za siabie, za zdaroŭje. I ja pajšoŭ na treniroŭki, mnie heta vielmi dapamahło ŭ płanie zdaroŭja, ja kinuŭ palić, pačaŭ zajmacca stała sportam. Kamanda raz na hod robić nabor hulcoŭ, ja tak i pryjšoŭ. Kali ty im padabaješsia, to traplaješ u asnoŭnuju kamandu. Hulaju na pazicyi kornierbeka — heta abarona kryła. Skažam, u atacy jość hulcy, jakija łoviać dalokija pasy, a maja rabota zaklučajecca ŭ tym, kab nie dać pryniać hetyja pasy ci ŭ ideale pierachapić.
Sioleta my budziem udzielničać va Uschodniejeŭrapiejskaj lizie, dzie hulajem suprać «Zubroŭ» i «Lićvinaŭ». Amal dakładna, što sioleta my budziem hulać u Minsku, tak što zaprašaju ŭsich na hulni. U mianie na šlemie Pahonia».
Siamja
Kroŭ u razvodzie, ad šlubu ŭ jaho zastalisia dzieci. «U mianie dva syny. Adnamu vosiem hadoŭ, druhomu — šeść. Zaŭsiody aktyŭna bavim čas, ja nie lublu siadzieć doma. Hanarusia svaimi chłopcami», — kaža repier.
***
Taksama Kroŭ maje svoju staronku ŭ instahramie, dzie vielmi aktyŭny. Tam vy možacie sačyć za padziejami ŭ jahonam žyćci.
