Klimatyčnaja zima ŭ Biełarusi ŭ hetym hodzie tak i nie nastupiła. Upieršyniu ŭ historyi
Novy hod u hetym hodzie byŭ prykładna taki, fota Nadziei Bužan
Klimatyčnaja zima ŭ Biełarusi ŭ hetym siezonie da hetaha času nie nastupiła i, kali nastupnyja dva tydni budzie ŭstojlivy plus, nie nastupić zusim. Tady hetaja zima ŭvojdzie ŭ historyju krainy jak adzinaja zima, jakoj nie było, paviedamlaje Tut.by.
Klimatyčnaja zima — heta pieryjad sa siaredniesutačnaj tempieraturaj pavietra 0 hradusaŭ i nižej. Pačatkam klimatyčnaj zimy ličycca ŭstojlivy pierachod siaredniasutačnaj tempieratury ad 0 hradusaŭ u bok panižeńnia, kancom — ustojlivy pierachod praz 0 hradusaŭ u bok pavyšeńnia. Naša paniaćcie klimatyčnaj zimy padobna da paniaćciaŭ klimatyčnaj zimy ŭ inšych postsavieckich krainach.
— Hetaj zimoj u nas ŭstojlivaha pierachodu siaredniasutačnaj tempieratury praz 0 hradusaŭ u bok panižeńnia pakul nie było, — kaža Natalla Klaviec, načalnik adździeła vyvučeńnia źmien klimatu Biełhidramieta. — Ci budzie ŭ hetym siezonie klimatyčnaja zima, skazać składana, heta paniaćcie pryviazana da prahnozu nadvorja, ale pakul my jaje nie čakajem.
Zvyčajna klimatyčnaja zima ŭ Biełarusi pačynajecca ŭ kancy listapada — pačatku śniežnia.
U minułym siezonie jana pačałasia 8 studzienia. Jak praviła, skančajecca klimatyčnaja zima ŭ pieršaj-druhoj dekadzie sakavika, a na poŭdni, paŭdniovym zachadzie krainy — u kancy lutaha.
Siezona biez klimatyčnaj zimy ŭ nas jašče nie było. Kali dva nastupnyja tydni buduć ciopłyja, to hetaja zima budzie samaj ciopłaj za ŭsiu historyju mieteanazirańniaŭ i, mahčyma, stanie adzinaj, kali klimatyčnaja zima nie nastupiła. Samaja ciopłaja zima ŭ nas raniej była ŭ 1989-1990 hadach, tam siaredniaja minusavaja tempieratura była minus 0,1 hradusa.
U siarednim klimatyčnaja zima ŭ Biełarusi na poŭdni krainy mahła być 60 dzion, a na poŭnačy i paŭnočnym uschodzie — 90-100 dzion. Z časam praciahłaść klimatyčnaj zimy pamianšajecca.
— U siarednim z 1989 pa 2019 hod klimatyčnaja zima skaraciłasia dzieści na piać-siem dzion u paraŭnańni z normaj. Čakajecca, što ŭ budučyni zimovyja tempieratury buduć raści, adpaviedna, klimatyčnaja zima budzie skaračacca.
Natalla Klaviec adznačaje: toje, što ŭ hetym hodzie klimatyčnaja zima nie nastupiła, — anamalija.
— Heta nietypovyja ŭmovy dla terytoryi našaj krainy. My bačym pieravažna siaredniasutačnyja plusavyja tempieratury, i heta nie narmalna. I, chutčej za ŭsio, ad hetaha budzie bolš admoŭnych nastupstvaŭ, čym stanoŭčych. U hetym hodzie ŭ nas byli častyja pierachody ź plusavych tempieratur da admoŭnych, i heta niehatyŭna adbivajecca, u pryvatnaści, na daŭhaviečnaści budynkaŭ.
