Ludmiła Rubleŭskaja. ***Ja nie lepiej za inšych...
Ja nie lepiej za inšych – dušoju kalek –
Moža tolki, ja hrebuju kryšku...
Siońnia i ŭ nastupnyja dni hetaha tydnia ŭ rubrycy «Litaratura» na sajcie NN štodzień pa dobrym i trochi padzabytym tvory z darobku «Tutejšych» — supołki, što revalucyjanizavała biełaruskuju litaraturu na vychadzie z SSSRu. Udzielničała ŭ «Tutejšych» i ciapierašniaja ahladalnica «Sovietskoj Biełoruśsii» Ludmiła Rubleŭskaja.
Hety — pa-svojmu prarocki — vierš Ludmiły Rubleŭskaj układalnik, Siarhiej Dubaviec, źmiaściŭ u samym pačatku zborniku «Tutejšyja» (1989).
* * *
Ja nie lepiej za inšych.
Mnie tolki strašniej,
Kali horad vysmoktvaje soki
Sa svaich ačmurełych ad tłumu dziaciej.
Ścieny – blizka, a nieba – vysoka.
Ja nie lepiej za inšych – dušoju kalek –
Moža tolki, ja hrebuju kryšku,
Tolki dźviery začynić za mnoj čałaviek,
Jak carkoŭnik – pahanskuju knižku.
Ja – nie lepiej za inšych.
I ja havaru
Dabradziejam «Spasibo» – nie «Dziakuj».
Ja adsiul nie ŭciaku, «u straściach» nie zharu.
Tolki viečna na mohiłki ciahnie.
Ja nie lepiej za inšych.
A vy – za mianie.
My ŭ adnym zamacovany radzie,
Jak ćviki, što macujuć na blakłaj ścianie
Marmurovuju miortvuju pamiać.
* * *
Štodzionna ŭ rubrycy «Litaratura» na sajcie NN — novyja tvory i minijatury. Čytajcie dla serca, čytajcie dla rozumu, čytajcie dla movy.
