Kupałaŭski teatr u sakaviku prezientuje płastyčny śpiektakl pra Šahała
Premjera chareahrafičnaj pastanoŭki «En souvenir de Šahał» («Uspaminajučy Šahała») rasijskaha režysiora Siarhieja Ziamlanskaha adbudziecca 14 i 15 sakavika, nastupnyja pakazy — 26 i 27 sakavika, paviedamlaje pres-słužba Kupałaŭskaha.
Fota pres-słužby Kupałaŭskaha
Mojša Siehał abo Mark Šahał — imia, jakoje mastak uziaŭ ŭžo ŭ Paryžy —adzin z samych admietnych jeŭrapiejskich avanhardystaŭ taho času. Jon nikoli nie zabyvaŭ pra rodny Viciebsk, bo hety horad padaryŭ jamu nie tolki ŭspaminy, jakija jon paźniej uvasobiŭ u svaich pałotnach, ale i vialikaje kachańnie. Śpiektakl na Kupałaŭskaj scenie — historyja losu Marka Šahała, ad samaha naradžeńnia mastaka da śmierci jaho muzy Beły. Siarhiej Ziamlanski i Kupałaŭski teatr znajšli adno adnaho: režysior na praciahu mnohich hadoŭ pahłyblaŭsia ŭ šahałaŭskuju temu, vyvučaŭ jaho tvorčaść i aŭtabijahrafičnyja krynicy, a śpiektakl pra adnaho z samych značnych mastakoŭ, jakija naradzilisia na biełaruskaj ziamli, vidavočna, pavinien byŭ źjavicca ŭ repiertuary Kupałaŭskaha teatra. Śpiektakl budzie ŭjaŭlać saboj volnuju interpretacyju žyćcia i tvorčaści mastaka, zhodna z ahulnaviadomymi faktami.
Nad stvareńniem śpiektakla pracavała viadomaja rasijskaja pastanovačnaja kamanda. Siarhiej Ziamlanski — režysior i chareohraf. Stvaryŭ bolš za 20 śpiektaklaŭ u dramatyčnych teatrach Rasii, Łatvii, Izraila, a taksama pracuje nad pastanoŭkaj ŭ Paŭdniovaj Karei. Žanr, u jakim režysior pradstavić śpiektakl u Kupałaŭskim teatry, unikalny — heta «śpiektakl biez słoŭ», u jakim usia historyja budzie raskazana movaj cieła bieź vierbalnych srodkaŭ.
Mastak pa kaściumach i aŭtar scenahrafii — zasłužany mastak Rasijskaj Fiederacyi, hałoŭny mastak Vachtanhaŭskaha teatra i dvuchrazovy naminant premii «Załataja maska» Maksim Abrezkaŭ. Libreta da śpiektakla na asnovie ahulnaviadomych faktaŭ z žyćcia Marka Šahała napisaŭ Andrej Ščotkin. Aŭtar aryhinalnaj muzyki da śpiektakla — Pavieł Akimkin. Mastak pa śviatle — Alaksandr Sivajeŭ. Videaprajekcyju da śpiektakla z vykarystańniem rabot Maksima Abrezkava stvoryć Siarhiej Ryłko.
Rolu Marka Šahała ŭ śpiektakli vykonvajuć Pavieł Charłančuk-Južakoŭ i Ivan Kušniaruk, rolu Beły — Marta Hołubieva i Viktoryja Čaŭłytka. Taksama ŭ śpiektakli zadziejničany Kaciaryna Alejnikava, Jeva Anikiej, Pavieł Astravuch, Andrej Hradabojeŭ, Taćciana Dzianisava, Andrej Drobyš, Kryścina Drobyš, Antanina Dubatoŭka, Alaksandr Zielanko, Michaił Zuj, Dzijana Kaminskaja, Jaŭhienija Kulbačnaja, Juljana Michnievič, Nastaśsia Navickaja, Raman Padalaka, Pavieł Paŭluć, Michaił Śvita, Ivan Trus, Siarhiej Čub, Iłaryja Šaško, Julija Špileŭskaja.