Łukašenka padpisaŭ ukaz ab ilhotach dla ludziej, jakija słužyli ŭ armii. Termin słužby buduć zaličvać u strachavy staž
Alaksandr Łukašenka 10 lutaha padpisaŭ ukaz numar 48 «Ab pavyšeńni ŭzroŭniu sacyjalnaj abarony hramadzian u suviazi z pryzyvam na terminovuju vajennuju słužbu, słužbu ŭ reziervie».
Fota Nadziei Bužan.
Z 1 studzienia 2020 hoda vajennasłužačyja, jakija prachodziać terminovuju vajennuju słužbu, padlahajuć abaviazkovamu dziaržaŭnamu sacyjalnamu strachavańniu na vypadak dasiahnieńnia piensijnaha ŭzrostu, invalidnaści i straty karmiciela. Ukazam vyznačajecca paradak vypłaty abaviazkovych strachavych uznosaŭ za pieryjady terminovaj vajennaj słužby, što dazvolić zaličvać takija pieryjady ŭ strachavy staž, nieabchodny dla vyznačeńnia prava na pracoŭnuju piensiju.
Dla hramadzian, jakija prajšli terminovuju vajennuju słužbu, słužbu ŭ reziervie, praduhledžany dadatkovyja lhoty dla padrychtoŭki da pastupleńnia ŭ navučalnyja ŭstanovy, a taksama pieravažnaje prava vybaru miesca raboty pa śpiecyjalnaści pry raźmierkavańni paśla atrymańnia adukacyi. Takim hramadzianam u hod zvalnieńnia abo ŭ hod, što idzie za hodam zvalnieńnia, pry najaŭnaści siaredniaha bała ŭ dakumiencie ab adukacyi nie nižejšaha za 6 bałaŭ i pa rekamiendacyi voinskich čaściej pradastaŭlena prava na navučańnie na fakultetach davuzaŭskaj padrychtoŭki, padrychtoŭčych adździaleńniach, padrychtoŭčych kursach u dziaržaŭnych ustanovach siaredniaj śpiecyjalnaj i vyšejšaj adukacyi za košt srodkaŭ respublikanskaha i (abo) miascovych biudžetaŭ.
Akramia taho, uviedziena norma ab zachavańni prava karystańnia žyłym pamiaškańniem dziaržaŭnaha žyllovaha fondu ŭ internatach členami siamji vajennasłužačaha na ŭvieś pieryjad terminovaj vajennaj słužby.
