U Irłandyi Šyn Fiejn upieršyniu zaniała pieršaje miesca na vybarach
Mery Łu Makdonald — kiraŭnica Šyn Fiejn, jakaja pryviała partyju da pieramohi
Nie fakt, adnak, što jana ŭvojdzie va ŭrad.
Nacyjanalistyčnaja partyja Šyn Fiejn upieršyniu vyjšła na pieršaje miesca pa kolkaści hałasoŭ na vybarach u parłamient Irłandyi. Za Šyn Fiejn (nazva pierakładajecca jak «My sami») prahałasavali 25% vybarcaŭ.
Pravacentrysckaja Fijana Fajł nabrała 22% hałasoŭ. Inšaja pravacentrysckaja partyja Fine Hał sabrała 20%. Heta jana kiravała Irłandyjaj apošniaje dziesiacihodździe, apošnija hady pad kiraŭnictvam pieršaha ŭ historyi krainy premjera-hieja, pryčym indyjskaha pachodžańnia, Lea Varadkara.
Astatnija hałasy padzialilisia miž zialonymi, sacyjał-demakratami, lejbarystami i lavicaj.
Šyn Fiejn doŭhi čas była palityčnym kryłom Irłandskaj respublikanskaj armii, jakaja viała ŭzbrojenuju baraćbu za dałučeńnie Paŭnočnaj Irłandyi da Irłandskaj Respubliki.
Miascovyja ahladalniki pišuć, što pośpiech Varadkara na pieramovach pa Breksicie nie dapamoh jahonaj partyi. Vybarcaŭ najbolš turbujuć prablemy koštu žytła i dastupnaści miedycynskaj dapamohi.
Šyn Fiejn praciahvaje vystupać za abjadnańnie dźviuch častak Irłandyi. Vychad Brytanii ź Jeŭrasajuza daje dla hetaha novy šaniec. Členstva ŭ Jeŭrasajuzie zastajecca i vyhadnym dla Paŭnočnaj Irłandyi, i papularnym tam.
Za časy členstva ŭ Jeŭrasajuzie Irłandyja pierahnała Brytaniju pa ŭzroŭni vałavoha ekanamičnaha praduktu na dušu nasielnictva.
