Ivan Ejsmant i Davydźka abmiarkoŭvali na BT płatny dostup da «Našaj Nivy»
Adnoj z temaŭ čarhovaha «Kłuba redaktaraŭ» na BT staŭ płatny dostup da sajta «Našaj Nivy».
Udzielniki prahramy na čale sa staršynioj Biełteleradyjokampanii Ivanam Ejsmantam zacikavilisia vykazvańniem Hienadzia Davydźki, apublikavanym na sajcie «NN». Ale nie zmahli jaho pračytać, bo jano znachodzicca ŭ płatnym dostupie.
Čytajcie. Davydźka: U «Vosieni patryjarcha» Markiesa šmat paralelaŭ ź Biełaruśsiu
«Žurnalist «Našaj Nivy» ŭziaŭ intervju ŭ Hienadzia Davydźki. I atrymaŭsia voś taki zahałovak. «Davydźka: «U «Vosieni patryjarcha» Markiesa šmat paralelaŭ ź Biełaruśsiu». Chto nie ŭ kursie, «Vosień patryjarcha» — tvor pra staroha dyktatara, jaki naprykancy zusim vyžyŭ z rozumu. I my ŭsie padumali: i praŭda, što tam takoha Hienadź Branisłavavič skazaŭ? — zajaviŭ Ivan Ejsmant. — Ale nie! Artykuł akazaŭsia płatnym. U vyniku ŭžo kolki dzion jon visić zakrytym dla bolšaści čytačoŭ, a zahałovak kryčyć na ŭsiu krainu. Ja prapanuju prosta zaraz pacikavicca ŭ Hienadzia Davydźki, ci sapraŭdy «Naša Niva» napisała toje, što jon chacieŭ skazać, albo atrymałasia jak zaŭsiody».
U vyniku vyrašyli pazvanić Davydźku. Jaho hołas vyvieli ŭ studyju.
«Ja čytaŭ hety zahałovak. Ja na hety sajt časam zachodžu, uvohule «Našu Nivu» navat pavažaju. Tamu što «Naša Niva» nie vykonvaje ideałahičnuju zamovu z-za miažy. Jany — «Naša Niva» — prosta takija junyja i «Baba-jaha suprać», tamu časam tam byvajuć cikavyja materyjały. Ja natyknuŭsia na hety zahałovak, hladžu — płatny. Jołki-pałki, nu chaj zarablajuć na maim mierkavańni, tolki b nie skažali i nie pieradziorhvali! — patłumačyŭ Hienadź Davydźka.
Prosta kali da mianie padyšli ŭ śpiešcy na vystavie i spytali, jakija knihi ja lublu, ja skazaŭ: Habryel Markies. «A što mienavita?» Nu, kažu, «Sto hadoŭ adzinoty». «A jak vam «Vosień patryjarcha? Nie ličycie, što jość ahulnaje niešta?» Nu sprava ŭ tym, što kłasika jość kłasika, i tam abahuleny vobraz usich isnujučych tyranaŭ u Markiesa! U hetym ramanie, nakolki ja pamiataju, kuča lehiend, historyj, plotak, jakija supiarečać adna adnoj. I heta satyryčny, fantasmaharyčny raman. Ja nie viedaju, što tam chłopcy vyciahnuli, ale sam fakt: atrymlivać hrošy, jak jany kažuć, za prapahandysta Davydźku — najvyšejšy piłataž, ja ich vinšuju».
«Budziem spadziavacca, «Naša Niva» ŭsio ž adkryje nam hety artykuł, kuplać my jaho — prabačcie, Hienadź Branisłavavič, — nie budziem», — padsumavaŭ Ivan Ejsmant.
Padpisacca na «NN» možna pa spasyłcy. Dostup da płatnych artykułaŭ kaštuje ŭsiaho 8 rubloŭ na miesiac. A na hod — 60 rubloŭ. U raźvitych krainach bolšaść internet-ŚMI — płatnyja. U Biełarusi «Naša Niva» — pieršaja praktykuje anłajn-padpisku.
