Akciory Kupałaŭskaha praviaduć majstar-kłas dla dziaciej. Jak tudy trapić?
10 lutaha akciory Nacyjanalnaha akademičnaha teatra imia Janki Kupały Pavieł Charłančuk i Kryścina Drobyš praviaduć majstar-kłas pa teatralnym majsterstvie dla dziaciej 11-16 hadoŭ. Kab vašy dačka ci syn trapili na ŭrok da znakamitych akcioraŭ, treba nabyć łot «Majstar-kłas z Kupałaŭcami» na Ulej.by.
Mierapryjemstva projdzie ŭ miežach prajekta «Pieršy inkluziŭny śpiektakl na scenie Kupałaŭskaha»: virtuozy teatralnaj spravy navučać cikavym akciorskim pryjomam vychavancaŭ teatra «i», jakija 29 lutaha pakažuć pastanoŭku «Adnojčy ŭ vializnym horadzie». Arhanizatary pakinuli try vakantnyja miescy, kab da inicyjatyvy mahli dałučycca inšyja talenavityja dziaŭčaty i chłopcy.
U supolnym prajekcie teatra «i» dy Teatra imia Janki Kupały syšlisia nobieleŭskaja łaŭreatka Śviatłana Aleksijevič, čempijon śvietu pa muaj-taj i salist BRUTTO Vital Hurkoŭ, rok-hurt NIZKIZ, post-pank muzyki «Mołčat Doma», restaran Enzo dy inš. Łoty ad niekatorych partnioraŭ jašče zastalisia ŭ najaŭnaści na staroncy prajekta.
Meta niečakanaj kałabaracyi — pradstavić pieršy ŭ historyi inkluziŭny śpiektakl na hałoŭnaj scenie Kupałaŭskaha i padaryć junym akcioram, u tym liku dzieciam z aŭtyzmam, adnu z najvažniejšych teatralnych scen Biełarusi.
— Dla luboha dziciaci vystupać na scenie — vialikaja padzieja i nahoda dla honaru, — kaža mastacki kiraŭnik siamiejnaha inkluziŭ-teatra «i» Iryna Puškarova. — Vystup ža na takoj značnaj u maštabach krainy placoŭcy, jak hałoŭnaja scena Teatra imia Janki Kupały, pakul usprymajecca našymi vychavancami jak śmiełaja mara ci amal niedasiažnaja kazka. Nieŭzabavie hetaja kazka pieratvorycca ŭ realnaść — ščyra dziakujem za heta kraŭdfandaram!
«Adnojčy ŭ vializnym horadzie» — biełaruskamoŭnaja pastanoŭka, zasnavanaja na siužecie apaviadańnia F.M. Dastajeŭskaha. Admysłovyja 3D-dekaracyi dapamahajuć emacyjna adčuć historyju chłopčyka, jaki straciŭ svaju siamju i zastaŭsia zusim adzin na chałodnych vulicach vialikaha horada biez šansaŭ na vyratavańnie… Kvitki pradajucca tolki na Ulej.by.
