Premjeram DNR staŭ były rasijski vice-hubiernatar
Fota z aficyjnaha sajta DNR
Premjer-ministram niepryznanaj Danieckaj narodnaj respubliki (DNR) staŭ były vice-hubiernatar Irkuckaj vobłaści Uładzimir Paškoŭ, piša lenta.ru.
Infarmacyja pra toje, što Paškoŭ vykonvaje abaviazki kiraŭnika ŭrada, źjaviłasia na sajcie kiraŭnika DNR Dzianisa Pušylina 5 lutaha. Raniej hetuju pasadu zajmaŭ Alaksandr Anančanka. Aficyjnych zajaŭ ab pierastanoŭkach va ŭładzie niepryznanaj respubliki nie było.
Pres-sakratar prezidenta Rasii Dźmitryj Piaskoŭ, kamientujučy mahčymaje pryznačeńnie Paškova, skazaŭ žurnalistam, što havorka nie idzie pra «aficyjnaje delehavańnie aficyjnaj asoby». Jon padkreśliŭ, što Rasija absalutna nie datyčnaja da kanfliktu na paŭdniovym uschodzie Ukrainy.
Rasijski hramadzianin Paškoŭ naradziŭsia ŭ Bracku, byŭ vice-meram horada ŭ 2005 hodzie, da 2014-a pracavaŭ namieśnikam hubiernatara Irkuckaj vobłaści. Paśla sychodu ź dziaržsłužby jon zasnavaŭ šerah kampanij i ŭznačaliŭ pradpryjemstva «Źniešhandalservis» źbiehłaha ŭkrainskaha aliharcha Siarhieja Kurčanki. U sakaviku 2017 hoda kampanija atrymała kantrol nad nacyjanalizavanymi zavodami ŭ DNR i ŁNR. Słužba biaśpieki Ukrainy śćviardžała, što praz dabračynny fond Paškova Rasija finansavała biudžet ŁNR, sprabujučy paźbiehnuć novych ekanamičnych sankcyj.
